Kóshpeli qabyldaýlar barysynda balalarǵa erekshe kóńil bólindi. 40 balaǵa logoped-defektolog, psıholog, beıimdelgen dene shynyqtyrý mamany jáne pedıatr keńes berdi. Tekserý qorytyndysy boıynsha qazan aıynda bes balaǵa tegin ońaltý sharalary uıymdastyrylady.

Jalpy, 462 adamǵa medısınalyq kómek kórsetilip, sonyń ishinde 389 adamdy dáriger-onkologtar qabyldady. Bul rette, on adam onkologqa alǵash ret júginip otyr. Endi olar qosymsha tekserýden ótý úshin oblys ortalyǵyna jiberiledi.

Sonymen qatar 33 adam AITV ınfeksıasynyń aldyn alý boıynsha konsýltasıadan ótti.

«Beıindi mamandardyń aýdanǵa kelýi turǵyndardyń keńes alýyn jáne dárigerge júginý isin keıinge qaldyrmaýyn aıtarlyqtaı jeńildetedi. Birneshe mamanǵa suraq qoıý jáne birden qajetti usynym alý múmkindigi bolǵany – asa mańyzdy», – dedi Kúrshim aýdanynyń turǵyny Vladımır Petrov.

«Ádilet Kerýeni» negizgi baǵyttarynyń biri – aýrýlardyń aldyn alý jáne olardy erte anyqtaý. Kóshpeli qabyldaýlar barysynda mamandar turǵyndarǵa densaýlyqtyń qandaı ózgeristerine mán berý jáne qaı kezde dárigerge júginý qajet ekenin de túsindirýde.

«Bastapqy kezeńde kóp aýrýdyń aıqyn belgiler bolmaýy múmkin. Sondyqtan profılaktıkalyq tekserýden ótý jáne mamanǵa der kezinde júginý – asa mańyzdy. Kóshpeli qabyldaýlar barysynda turǵyndarǵa tek keńes berip qana qoımaı, densaýlyqtyń qandaı ózgeristerine nazar aýdarý qajet ekenin túsindirýge tyrysamyz»,– dedi dáriger-onkolog Erbol Qusaıynov.

Medısınalyq konsýltasıalardan bólek, turǵyndarǵa zańgerler men sot oryndaýshylary quqyqtyq kómek kórsetti. Sondaı-aq azamattar turǵyn úı máselesi boıynsha «Otbasy banki» mamandarynan keńes alyp, depýtattardyń qoǵamdyq qabyldaý bólmesine de júgindi.  

Aldaǵy ýaqytta «Ádilet Kerýenin» elimizdiń ózge da óńirlerinde ótkizý josparlanyp otyr. Mundaı format shalǵaı eldi mekenderdiń turǵyndaryna oblys ortalyǵyna barmaı-aq qajetti kómek alýǵa múmkindik beredi.

Partıanyń qyzmeti týraly basqa da jańalyqtardy resmı Telegram-arnamyzdan oqı alasyzdar: https://t.me/adilet_partiyasy