1 qazan – halyqaralyq Qarttar kúnine oraı Semeı qalasynda saltanatty qabyldaý sharasy ótti. Qarıalarǵa qurmet kórsetýge arnalǵan jıynǵa oblys ákimi Berik Ýálı, óńirdiń qala-aýdandarynan ardagerler qatysty.
Aımaq basshysy ardagerlerdi merekemen quttyqtap, olardyń qoǵamdaǵy orny men sińirgen eńbegine qurmet bildirdi.
«Barshańyzdy Halyqaralyq qarttar kúnimen shyn júrekten quttyqtaımyn! Qazaqta: «Qarty bar úıdiń qazynasy bar», – deıdi. Rasynda, úlkendi syılap, aqsaqaldy tórge shyǵaryp, aq jaýlyqty anany ardaqtaǵan ataly joldy búginde jalǵastyrmaq nıetimiz bar. Sondyqtan búgingi basqosýymyzdyń «Qarttarǵa qurmet – urpaqqa mindet» dep atalýynyń ózinde úlken mán jatyr. Sizderdiń elge sińirgen qyzmetterińiz ben ómirden túıgen tájirıbelerińiz keıingi býyn úshin úlgi-ónege, baǵa jetpes qazyna. Memleket basshysy Qasym-Jomart Kemeluly Toqaev aǵa býynǵa degen qurmet pen olardyń áleýmettik ál-aýqatyn arttyrý máselesine erekshe mán berip keledi. «Ardagerler týraly» zań osy baǵyttaǵy memlekettik qoldaýdy júıeleýge berik negiz qalady. Prezıdentimiz qoǵamda «Zań men tártip», «Adal azamat» qaǵıdattaryn ornyqtyrýǵa erekshe mán beredi. Bul qundylyqtardy jas urpaqtyń boıyna sińirýde sizderdiń aqyl-keńesterińiz ben ómirlik tájirıbelerińizdiń orny bólek. Sizderge zor densaýlyq, uzaq ǵumyr, jaqyndaryńyzǵa amandyq, shańyraqtaryńyzǵa baq-bereke tileımin», – dedi Berik Ýálı.
Shara barysynda óńirdiń ár salasynda eńbegimen elengen ardagerler «Abaı oblysyna sińirgen eńbegi úshin» tósbelgisimen, oblys ákiminiń Alǵys hattarymen, respýblıkalyq Ardagerler uıymynyń «Qurmet» tósbelgisimen jáne Alǵys hattarymen marapattaldy.
Jyly ráýishte ótken kezdesýde ardagerler eldiń bereke-birligi, jastardyń bolashaǵy týraly oılaryn ortaǵa saldy.
Abaı oblysynda ardagerlerdi qoldaýǵa baǵyttalǵan jumystar júıeli túrde júrgizilýde. Bıyl Uly Otan soǵysynyń ardagerine 5 mıllıon teńge kóleminde birjolǵy áleýmettik kómek kórsetildi. Jeńis kúni qarsańynda 1 146 adamǵa 158 myń teńge kóleminde birjolǵy áleýmettik kómek berildi.
Búginde aımaqta 2 639 zeınetker arnaıy áleýmettik qyzmettermen qamtylǵan. Qart jandardyń belsendi ómir saltyn jalǵastyrýyna da jaǵdaı jasalýda. Qazirgi tańda oblysymyzda 395 bastaýysh ardagerler uıymy, 2 qalalyq jáne 10 aýdandyq ardagerler keńesi jumys isteıdi.
Óńirde 2 «Belsendi uzaq ómir súrý ortalyǵy» jumys isteıdi. Bıyl olardyń qataryna Kýrchatov qalasynda ashylǵan jańa ortalyq qosyldy. Semeı qalasyndaǵy ortalyqtyń 3 fılıaly bar. Qazirgi tańda bul ortalyqtarda 608 zeınetker túrli qyzmettermen qamtylyp otyr.
