Bilim kúninde Almaty oblysynda «Keleshek mektepteri» ulttyq jobasy aıasynda salynǵan bes jańa mektep esigin aıqara ashty. Bul bilim ordalarynda 4200 oqýshy bilim alady. Sondaı-aq tozyǵy jetken taǵy 10 bilim ordasy kúrdeli jóndeýden ótip, búgin paıdalanýǵa berildi. Bıyl óńirde 36 myńǵa jýyq búldirshin alǵash ret mektep tabaldyryǵyn attady. Osylaısha, jańa oqý jylynda oblystaǵy 502 jalpy bilim beretin mektepte 384 myńnan astam oqýshy tárbıelenedi, – dep habarlaıdy Almaty oblysy ákiminiń baspasóz qyzmeti.

Almaty oblysynda úsh aýysymdy oqytýdy joıyp, sapaly bilim berý maqsatynda sońǵy tórt jylda 75 jańa mektep ashylyp, 6 qosymsha japsarjaı salyndy. Onyń 26-sy «Keleshek mektepteri» ulttyq jobasy aıasynda boı kóterdi. Nátıjesinde úsh aýysymdy bilim berý uıymdarynyń sany 52-den 23-ke azaıyp, shalǵaı eldi mekenderdegi 6000-ǵa jýyq oqýshynyń tasymal máselesi sheshildi. Sonymen qatar aldaǵy ýaqytta EPC+F tetigi arqyly nemese memlekettik-jekemenshik seriktestik aıasynda 10 mekteptiń qurylysy josparlanyp otyr.

Búgin paıdalanýǵa berilgen mektepter Alataý qalasy, İle, Qarasaı jáne Eńbekshiqazaq aýdandarynda ornalasqan. Munda zamanaýı pán kabınetteri, fızıka, hımıa jáne bıologıa zerthanalary, ınformatıka, STEM jáne robototehnıka kabınetteri, kitaphana, oqý zaly, sport zal, asqana, medısınalyq pýnkt, májilis zaly, shyǵarmashylyq jáne kovorkıng aımaqtar qarastyrylǵan. Buǵan qosa, mektepter sıfrlyq oqytý tehnologıalarymen, joǵary jyldamdyqty ınternetpen, beınebaqylaý jáne qaýipsizdik júıelerimen jabdyqtalǵan. Erekshe qajettiligi bar balalar úshin de barlyq qolaıly jaǵdaı jasalǵan. Bul oqýshylardyń tereń bilim alýyna, shyǵarmashylyq jáne zıatkerlik qabiletterin damytýyna jol ashady. Óńirde ınfraqurylymdy jańartý jumysy munymen shektelmeıdi. Keshendi josparǵa sáıkes, 2025-2027 jyldar aralyǵynda oblystaǵy 91 mektepke kúrdeli jóndeý júrgizý kózdelgen.

Alǵashqy qońyraý kúmbiri İle aýdany N. Tilendıev aýylyndaǵy sýjańa «Keleshek mektebinde» de estildi. Jalpy aýmaǵy 10 myń sharshy metrden asatyn nysan 900 oryndy jáne ǵımaratta 44 synyp bar. Jobanyń jalpy quny – 7,5 mlrd teńge. Búgin munda 100-ge jýyq oqýshy mektep tabaldyryǵyn alǵash ret attap, barlyǵy 1 230 bala qabyldandy.

Saltanatty sharaǵa Almaty oblysynyń ákimi Marat Sultanǵazıev qatysyp, oqýshylar men ustazdardy, ata-analardy bilim kúnimen quttyqtady.

«Memleket basshysy Qasym-Jomart Toqaev óz sózinde «Biz Qazaqstandaǵy barlyq balalardyń baqytty bolashaǵyn qamtamasyz etýimiz kerek» dep atap ótkendeı, óskeleń urpaqqa sapaly bilim berip, olardyń jan-jaqty damýyna jaǵdaı jasaý – memleketimizdiń mańyzdy mindetteriniń biri», – dedi aımaq basshysy. Sonymen qatar bilim salasyn qoldaý maqsatynda óńirde atqarylǵan aýqymdy jumystar men oqýshylardyń jetistikterine toqtaldy. Aıtýynsha, ótken oqý jylynda oblys oqýshylary jaratylystaný-matematıkalyq baǵyt boıynsha respýblıkalyq olımpıadada úzdik úshtikke endi, aýyl mektepteri arasynda komandalyq İ oryndy jeńip alyp, chempıon atandy. Qos birdeı jas daryn Ulttyq biryńǵaı testileýdiń eń joǵary kórsetkishi – 140 baldy jınap, rekord jasady. Sonymen qatar 1 831 mektep bitirýshi «Altyn belgini» enshilese, 1 675 túlek «Úzdik atestat» aldy. 7 myńnan astam oqýshy memlekettik bilim berý grantyn ıelendi.

Jańa mekteptiń ashylý saltanatynda óńir basshysy úzdik ustazdardy memlekettik nagradalarmen, Alǵys hattarmen marapattady. Sonymen qatar úlken ómirdiń bosaǵasynda turǵan túlektermen júzdesip, olardyń synyp saǵatyna qatysty. Oqýshylarmen Ata Zańnyń qasıeti, «Zań men tártip», «Taza Qazaqstan» tujyrymdamalarynyń máni jaıly ashyq áńgime órbitti.

Aýyl turǵyndary da jańa nysannyń boı kótergenine dán rıza. Solardyń biri – Qorǵasbek Qojahmetolla.
«N. Tilendıev aýylynda jańa mektep ashylǵanyna óte qýanyshtymyz. Sol úshin Memleket basshysyna, oblys ákimdigine alǵys aıtamyn. Bul bilim ordasynan el-jurtyna qyzmet etetin, oı-órisi keń azamattar ósip shyǵady dep senemin. Endi osy mektepte meniń tórt nemerem bilim alady. Mektep kóńilimizden shyqty», – dedi turǵyn.

Sý jańa nysanǵa aıaq basqan oqýshylardyń da qýanyshynda shek joq.

«Ózim bıologıa pánin jaqsy kóremin ári bolashaqta dáriger bolǵym keledi. Bul armanyma osy mektepte oqý arqyly bir taban jaqyndaımyn degen úmittemin. Sebebi munda arnaıy synyptarda túrli tájirıbeler jasap, bilimimdi jetildire alamyn. Jańa mektep bizge qatty unady», – deıdi 11-synyp oqýshysy Káýsar Qýanbaı.