Qazaqstan ekonomıkasynyń bilim men ınovasıalarǵa bet burýy sıfrlyq ortanyń mańyzdylyǵyn arttyra túsýde. 2025 jyldyń sońyndaǵy derekter boıynsha, eldegi ınternetpen qamtylý deńgeıi 93,4%-ǵa jetse, áleýmettik jelilerdi belsendi paıdalanýshylardyń úlesi halyq sanynyń 80,8%-yn qurady. Azıa damý bankiniń (ADB) derekterine súıensek, Qazaqstandaǵy shaǵyn jáne orta kásiporyndar (MSHOK) sektory turaqty túrde ósip keledi. Eldegi jumys istep turǵan kásiporyndardyń jalpy sany 2 175 605-ke jetip, MSHOK jumys kúshiniń 46,3%-yn qamtyp otyr jáne eldiń JİÓ-niń 39,5%-ǵa jýyq úlesin qamtamasyz etedi. Osyndaı qarqyndy sıfrlyq transformasıa jaǵdaıynda 2026 jylǵy 28 qazanda Almaty qalasynda ótip ótken «TikTok Impact Forum» jıyny eldegi kásipkerlikti damytýdaǵy jańa belesti aıqyndap berdi. İs-shara barysynda TikTok kompanıasy men Qazaqstan Respýblıkasy Ulttyq kásipkerler palatasy «Atameken» birlesip júrgizgen aýqymdy zertteýdiń jańartylǵan nátıjeleri tanystyryldy. Zertteý jumysy sıfrlyq platformalardyń, ásirese qysqa beıne-kontenttiń shaǵyn jáne orta bıznestiń damýyna, ónimderdi ilgeriletýge, satylymdy ósirýge jáne jańa naryqtarǵa shyǵýǵa tıgizetin ekonomıkalyq yqpalyn tolyqtaı ashyp kórsetti.
Zertteý nátıjeleri kórsetkendeı, TikTok qazaqstandyq bıznesti ilgeriletýde jaı ǵana oıyn-saýyq jelisi emes, tolyqqandy marketıńtik jáne komersıalyq quralǵa aınaldy. Platformada ilgeriletýge búdjet bóletin kompanıalardyń úlesi 2025 jylǵy 62,3%-dan 2026 jyly 75,7%-ǵa deıin ósti. Sondaı-aq platformadaǵy marketıńtik belsendilik pen kásiporyndardyń túsimi arasyndaǵy oń baılanysty aıqyndaıtyn korrelásıa koefısıenti 0,419-dan 0,545-ke deıin artqan. Saýalnamaǵa qatysqan kásipkerlerdiń 70%-dan astamy platformany bıznes maqsatynda aıyna keminde bir ret júıeli túrde paıdalanatynyn aıtty. Jalpy alǵanda, TikTok-tyń qazaqstandyq MSHOK túsimine tıgizetin tikeleı jáne janama ekonomıkalyq áseri eldiń JİÓ-niń 0,8–1,6%-y aralyǵynda baǵalanyp otyr. «Atameken» UKP Tóralqa Tóraǵasy Qanat Sharlapaev atap ótkendeı, arnaıy sıfrlyq platformalar taýardyń qalaı jasalatynyn kórsetýge, ujymdy tanystyrýǵa jáne jańa klıentter tabýǵa zor múmkindik beredi.
Otandyq brendterdiń is-júzindegi tájirıbesi bul tujyrymdardy tolyqtaı rastaıdy. Máselen, forýmda «Kulpunay bakery» kondıterlik óndirisiniń ókilderi TikTok arqyly bıznesti damytýdyń qyr-syrymen bólisti. Olar ónimderdi ASMR formatynda kórsetý jáne óndiristiń ishki tynys-tirshiligin, za kadrdaǵy eńbek pen daıyndaý prosesterin beıneleıtin óndiristik kadrlardy shyǵarý joǵary qaralym jınaıtynyn atap ótti. Sahna artyndaǵy tynymsyz jumysty ashyq kórsetý brendtiń tanymaldylyǵyn arttyryp, ónim satylymyn ósirip qana qoımaı, HR-brend retinde jumysqa turǵysy keletin mamandardyń aǵynyn kóbeıtken.
Osylaısha, bir ǵana platforma bir mezgilde birneshe bıznes-maqsatty júzege asyrýǵa múmkindik berip otyr.
Budan bólek, forýmda ózge de sátti keıster usynyldy. Shymkenttik «Al-AN Duken» kıim brendi TikTok-taǵy belsendiligi men tikeleı efırleriniń arqasynda bir jylda 15 myń jazylýshy jınap, satylymyn 20%-ǵa arttyrsa, «Lesnoe VKO» tabıǵı bal óndirýshisi platformadaǵy organıkalyq kontent arqyly sheteldik satyp alýshylar taýyp, eksporttyq áleýetin keńeıtti. Osyndaı jetistikterge jetýde kásipkerdiń ishki batyldyǵy men táýekelge bel baılaýy da mańyzdy rol atqarady. «Doner Na Satpayeva» tanymal fastfýd jobasynyń negizin qalaýshy – Elaman Bedelbaev atap ótkendeı, «Sátsizdikten qoryqqan adam eshqashan úlken nátıjege jetpeıdi, al óz-ózine senimdilik bildirip, táýekel etkender ǵana bızneste óz tarıhyn jaza alady».
Almatyda ótken «TikTok Impact Forum» jıyny sıfrlyq platformalardyń otandyq kásipkerlik pen el ekonomıkasyn órkendetýdegi strategıalyq mańyzyn aıshyqtap berdi. Zertteý nátıjeleri men sarapshylardyń pikirinshe, búgingi kúni tek sıfrlyq ınfraqurylymǵa qol jetkizý jetkiliksiz, sonymen birge kásipkerlerdiń sapaly kontent ázirleý, aýdıtorıamen keri baılanys ornatý jáne zamanaýı marketıńtik strategıalardy meńgerý daǵdylaryn damytý asa mańyzdy. Platforma usynatyn múmkindikterdi tıimdi ári batyl paıdalana bilgen shaǵyn jáne orta bıznes ókilderi básekege qabilettiligin arttyryp, óz brendin jańa sapalyq deńgeıge kótere alady. Osylaısha, sıfrlyq tehnologıalar men kásipkerlik batyldyqtyń toǵysýy Qazaqstannyń odan ári turaqty ekonomıkalyq damýynyń basty qozǵaýshy kúshine aınalyp otyr.
