Almatyda balalar úıleriniń tárbıelenýshileri men ata-anasynyń qamqorlyǵynsyz qalǵan balalarǵa arnalǵan «Áleýmettik sheberhana» jobasy aıasynda shyǵarmashylyq, bilim berý jáne tálimgerlik baǵytyndaǵy jumystar júıeli túrde júrgizilýde.
Joba Almaty qalasy Jastar saıasaty basqarmasynyń tapsyrysy boıynsha «QazEquality» qoǵamdyq qorynyń uıymdastyrýymen júzege asyrylýda. Oǵan balalar úıleriniń tárbıelenýshileri men túlekteri, sondaı-aq ata-anasynyń qamqorlyǵynsyz qalǵan balalar men jasóspirimder qatysýda.
Bastamanyń negizgi maqsaty - balalardyń shyǵarmashylyq qabiletterin damytý, olardyń qoǵamǵa beıimdelýine yqpal etý jáne bolashaqta óz betinshe ómir súrýine qajetti daǵdylardy qalyptastyrý.
Joba aıasynda balalar úshin vokal, horeografıa, akterlik sheberlik, sýret salý jáne ózge de baǵyttar boıynsha shyǵarmashylyq úıirmeler turaqty túrde uıymdastyrylýda. Sonymen qatar jasóspirimder barısta, barber, mobılografıa syndy zamanaýı mamandyqtardyń negizderin meńgerip, bolashaq kásibin tańdaýǵa múmkindik alýda.
Jobanyń erekshe baǵyttarynyń biri - «Tálimgerler mektebi». Onyń aıasynda balalarmen qoǵam qaıratkerleri, túrli sala mamandary, tanymal jáne medıa tulǵalar kezdesip, ómirlik tájirıbelerimen bólisedi. Kezdesýler barysynda jasóspirimder ózderin qyzyqtyrǵan suraqtarǵa jaýap alyp, bolashaq maqsattary men múmkindikteri týraly ashyq pikir almasady.
«Biz úshin bul jobanyń basty maqsaty - balalardyń bos ýaqytyn uıymdastyrý ǵana emes, olardyń boıyndaǵy qabiletti ashyp, bolashaqqa degen senimin qalyptastyrý. Árbir balanyń óz armany, qyzyǵýshylyǵy men áleýeti bar. Bizdiń mindetimiz - sol múmkindikterdi damytýǵa jaǵdaı jasaý, olardyń janynan tabylyp, durys baǵyt-baǵdar berý», - dep atap ótti joba uıymdastyrýshylary.
Jyl basynan beri joba sheńberinde 5 shyǵarmashylyq úıirme, 5 kásibı oqytý kýrsy uıymdastyrylyp, 20-dan astam kásiptik baǵdar berý is-sharasy, 20-dan astam psıhologıalyq trenıń jáne 10-nan astam mádenı-tanymdyq is-shara ótkizildi. Sondaı-aq balalar men túlekterge quqyqtyq, psıhologıalyq jáne áleýmettik qoldaý kórsetý jumystary júrgizilýde.
Uıymdastyrýshylardyń aıtýynsha, mundaı bastamalar balalardyń jańa ortaǵa beıimdelýine, ózine degen senimdiligin arttyrýǵa jáne qoǵammen baılanysyn nyǵaıtýǵa múmkindik beredi.
«Áleýmettik sheberhana» jobasy aldaǵy ýaqytta da balalardyń jan-jaqty damýyna, jańa múmkindikterdi ıgerýine jáne bolashaqqa senimdi qadam jasaýyna qoldaý kórsetýge baǵyttalǵan jumysyn jalǵastyrady.
