Búgin Marat Sultanǵazıev 2022 jylǵy maýsymnan beri basqaryp kelgen Almaty oblysynyń ákimi qyzmetinen ketti.
Onyń tórt jyldyq basqarý kezeńi ákimshilik bólinisten keıin óńirdiń qalyptasýy jáne oblys ortalyǵynyń Qonaev qalasyna kóshirilýimen tuspa-tus keldi. Osy ýaqyt ishinde oblys jalpy óńirlik ónim kólemi boıynsha eldegi onynshy orynnan kóshbasshy bestiktiń qataryna kóterilip, ekonomıkasyn eki esege jýyq ulǵaıtty jáne ınvestısıa kólemin eki eseden astam arttyrdy.
2022 jyly oblystyń jalpy óńirlik ónimi shamamen 3,4 trıllıon teńgeni qurasa, búginde bul kórsetkish shamamen 6,8 trıllıon teńgege jetti. Ónerkásip óndirisiniń kólemi 1,6 trıllıonnan 2,6 trıllıon teńgege deıin ósti. Onyń shamamen 90 paıyzy óńdeý ónerkásibine tıesili.
Osy kezeńde negizgi kapıtalǵa salynǵan ınvestısıa kólemi 614 mıllıard teńgeden 1,35 trıllıonǵa artty. Óńirde jalpy quny 724 mıllıard teńgeni quraıtyn 98 joba iske asyrylyp, shamamen 11 myń jumys orny quryldy.
Oblystyń qarjylyq bazasy da ózgerdi. Búdjettiń menshikti kiristeri 2,4 ese ósti, al respýblıkalyq búdjetten beriletin transfertterdiń úlesi 33 paıyzdan 13 paıyzǵa deıin tómendedi. Buǵan deıin donor-aýmaqtar qatarynda Qarasaı jáne İle aýdandary bolsa, búginde olardyń qataryna Eńbekshiqazaq, Talǵar, Jambyl aýdandary men Qonaev qalasy qosyldy.
Negizgi áleýmettik máselelerdiń biri halyq sanynyń jyldam ósýine baılanysty mektep tapshylyǵy boldy. 2022 jyly oblysta úsh aýysymdy 52 mektep bolsa, qazir olardyń sany 23-ke qysqardy. Tórt jyl ishinde 75 mektep ashyldy. Onyń ishinde bıyl jańa oqý jylynyń bastalýyna deıin jalpy 4200 oryndy bes mektep paıdalanýǵa berildi.
Sonymen qatar jańa oblys ortalyǵynyń ınfraqurylymy qalyptasty. Qonaevta ınjenerlik jeliler men ákimshilik nysandardyń qurylysy bastaldy. Aldaǵy ýaqytta munda teatr, «Qonaev Arena», Oqýshylar saraıy jáne basqa da áleýmettik nysandar salý josparlanýda.
Tórt jyl ishinde oblysta 3,7 mıllıon sharshy metr turǵyn úı paıdalanýǵa berildi. 6,6 myń azamat baspanamen qamtyldy. Olardyń qatarynda áleýmettik osal top ókilderi de bar.
Almaty oblysy aýyl sharýashylyǵynyń jalpy ónim kólemi boıynsha Qazaqstanda ekinshi oryndy saqtap, respýblıkadaǵy jalpy kólemniń 11,6 paıyzyn qamtamasyz etip otyr. 2022-2025 jyldary memleketke paıdalanylmaı jatqan 528 myń gektar aýyl sharýashylyǵy jeri qaıtaryldy. Tórt jyl ishinde sýarý jelilerin jańǵyrtýǵa 16,3 mıllıard teńge baǵyttaldy, al sý únemdeý tehnologıalary sýarmaly jerdiń 41,2 paıyzyna engizildi.
Týrızm salasy da aıtarlyqtaı damydy. Bıylǵy jazdyń ózinde Qapshaǵaı sý qoımasyna eki mıllıonnan astam adam keldi. Sonymen qatar Kólsaı kólderi men Qaıyńdynyń, Kóshpendiler qalashyǵynyń ınfraqurylymy damyp, tanymal týrısik nysandarǵa aparatyn joldar jóndeldi. Almaty oblysy iri sporttyq jáne mádenı-buqaralyq is-sharalardy ótkizý alańyna da aınaldy.
Sonymen birge halyq sany qarqyndy ósip kele jatqan oblys aldynda júıeli mindetter saqtalýda. Olardyń qatarynda aglomerasıadaǵy áleýmettik jáne ınjenerlik ınfraqurylym tapshylyǵy, aýyl sharýashylyǵyn sýmen qamtamasyz etý jáne iri ınvestısıalyq jobalardy tolyq aıaqtaý qajettigi bar.
