Álemge áıgili sýdaǵy «F1H2O» saıysy aldaǵy 5 jyl boıy Qapshaǵaı sý qoımasynda ótýi múmkin. Halyqaralyq saıystyń uıymdastyrýshylary arnaıy Almaty oblysyna kelip, óńir basshysy Marat Sultanǵazıevpen kezdesti. Jıynda álemdik F1H2O uıymy, iHolding kompanıasy jáne Saýd Arabıasynan kelgen resmı delegasıa ókilderi men Almaty oblysynyń ákimi 2027 jylǵy álem chempıonatyn Qonaev qalasynda ótkizý týraly kelisimge qol qoıdy, – dep habarlaıdy Almaty oblysy ákiminiń baspasóz qyzmeti.
Qazaqstan – bul álem chempıonatyn qabyldaıtyn altynshy memleket. Jarysqa shetelden keminde 5 myń qonaq keledi dep kútilýde. Jergilikti turǵyndar men týrıserdi qosqanda olardyń sany tipten artady. Sondaı-aq sý betindegi sheberlik pen jyldamdyqty jaqsy kóretin 1 mıllıardqa jýyq kórermen jarysty tikeleı efırden tamashalaıdy dep kútilýde.
«Saýd Arabıasy sport salasynda álemdegi eń úzdik jobalardy iske asyryp keledi. Bul belsendi demalysty damytyp, salaýatty ómir saltyn saqtaýǵa septigin tıgizedi. Jyl saıyn Qapshaǵaı sý qoımasynda «Tengri ultra» marafony men «Oceanman» ashyq sýda júzý jarysy ótkiziledi. Odan bólek respýblıkalyq deńgeıdegi túrli saıystar uıymdastyrylady. Mundaı halyqaralyq sharalar týrızmdi damytyp, óńirdiń órkendeýine jol ashady. Sondyqtan biz bul jobany birlesip iske asyrýǵa daıynbyz», – dedi Marat Eleýsizuly.
KSA ProMediaPortal jáne F1H2O uıymdarynyń ókili ári basqarma tóraǵasy Iasser Álı Ál-Ámı qazirgi tańda chempıonatqa 11 memleket qatysatynyn aıtty. Bul talaby joǵary kúrdeli jarys bolǵandyqtan, munda arnaıy daıyndyqtan ótken komandalar ǵana baq synaı alady. Chempıonat barysynda kórermenniń qaýipsizdigi tolyq qamtamasyz etiledi. VIP-aımaqtar, jarysty basqarý ortalyǵy, komandalardyń daıyndyǵyna arnalǵan aýmaq jáne medıa ortalyq qarastyrylady. Sondaı-aq otbasylyq demalysqa arnalǵan oryndar da qurylady. Onda elimizdiń mádenıeti tanystyrylyp, ulttyq taǵamdar men kádesyılar usynylady. Sport saıysynan bólek túrli merekelik is-sharalar jankúıerler kóńilin kóteredi. Jarystyń jabylý saltanatynda aýqymdy gala-konsert ótkizilip, onda álemge tanymal juldyzdar óner kórsetedi.
«Búginde Saýd Arabıasy men Qazaqstan arasynda berik yntymaqtastyq ornaǵan. Biz Almaty oblysynyń damý kórsetkishterin zerttep, onyń bolashaǵy zor ekenin kórdik. Aldaǵy ýaqytta bul aımaq halyqaralyq bıznes ortalyǵyna aınalady dep senemiz», – dedi basqarma tóraǵasy Iasser Álı Ál-Ámı.
Demek, aldaǵy 5 jylda Almaty oblysyna álemniń túkpir-túkpirinen sportsúıer jankúıer aǵylyp, Qonaev týrıser tolassyz keletin ortalyqqa aınalady. Chempıonat elimizdi dúnıejúzine tanytyp, onyń kórkem tabıǵaty men múmkindikterin álemge áıgileıdi. Óńirge ınvestısıa tartýǵa, ınfraqurylymyn jaqsartýǵa jáne ekonomıkany ilgeriletýge de zor yqpal etedi.
