Búgin, 24 qazan kúni Maqsat Táj-Murat Ánesulyna arnap jyldyq as beriledi.
Bıyl belgili jazýshy, esseıst, fılologıa ǵylymdarynyń kandıdaty, Qazaqstan Jazýshylar odaǵynyń múshesi, ulaǵatty ustaz Maqsat Táj-Murat Ánesulynyń ómirden ótkenine bir jyl tolyp otyr.
Maqsat Ánesuly bar ǵumyryn qazaq sóziniń qadirin arttyrýǵa, ult tarıhyn zertteýge, Alash qaıratkerleriniń murasyn zerdeleýge arnady. Ol ál-Farabı atyndaǵy Qazaq ulttyq ýnıversıtetinde ustazdyq etip, talaı jastyń ǵylym men jýrnalısıkaǵa bet burýyna jol ashty. Bilimi men tájirıbesin shákirtterine úıretip, artynda ónegeli iz qaldyrdy.
Maqsat Táj-Murat Ánesuly 1959 jyldyń qarasha aıynda Atyraý oblysy Jyloı aýdanynda dúnıege kelgen. QazMÝ-dyń jýrnalısıka fakúltetin támamdap, eńbek jolyn jýrnalısıka men ǵylymǵa arnady. Ár jyldary «Ana tili» ult aptalyǵynyń bas redaktory, respýblıkalyq basylymdarda jaýapty qyzmetker jáne ál-Farabı atyndaǵy QazUÝ-dyń dosenti bolyp eńbek etti.
Ol qazaq tarıhy men ádebıetin zertteýge eleýli úles qosty. «Sháńgereı: jasampazdyq ómiri», «Batys Alashorda: bıblıografıalyq sózdik tájirıbesi», «Mánshúktiń málimsiz maıdany» atty eńbekteri men júzden astam ǵylymı jáne pýblısısıkalyq maqalasy – qalamgerdiń mol murasynyń bir bóligi.
Maqsat Ánesulynyń ult tarıhyna degen adaldyǵy, ǵylymǵa sińirgen eńbegi men ustazdyq ónegesi ony biletin jandardyń jadynda saqtalady. Onyń shyǵarmalary men shákirtterine qaldyrǵan rýhanı murasy keıingi urpaq úshin de qundy bolmaq.
Jyldyq asyna shaqyrý
Asyl áke, ardaqty jar, qamqor baýyr, adal dos bolǵan Táj-Murat Maqsat Ánesulynyń rýhyna Quran baǵyshtap, duǵa jasaý maqsatynda marqumnyń jyldyq asyna shaqyramyz.
Ýaqyty: 24 qazan 2026 jyl, saǵat 13:00
Mekenjaıy: Almaty qalasy, Gogol kóshesi, 40, «Juldyz» meıramhanasy
As berýshiler: marqumnyń otbasy, baýyrlary men jaqyndary.
Marqumnyń ımany salamat, jany jánnatta bolsyn! Alla aldynan jarylqap, jatqan jerin jaıly etsin.
