Almaty oblysynda ár apta saıyn ótetin «Taza Qazaqstan» ekologıalyq aksıasy aıasynda erekshe kezdesý uıymdastyryldy. Oblys ákimi Marat Sultanǵazıev komýnaldyq qyzmetkerlermen birge jaǵajaıdy qoqystan tazartyp, keıin qarapaıym jumysshylarmen tańǵy as ústinde áńgimelesti.
Qonaev qalasynyń tazalyǵyna jaýapty jumysshylar úshin bul kútpegen kezdesý boldy. Tańmen talasa turyp, kóshe sypyrýǵa shyǵatyn komýnaldyq qyzmet mamandary óńir basshysymen birge tazalyq jumystaryn júrgizdi. Tipti kókeıdegi suraqtaryn qoıyp, erkin pikir almasty.
Ákim eńbek adamdarynyń kúndelikti tirshiligine, jumys jaǵdaıyna, mamandyqtyń qıyndyǵyna jáne turǵyndardyń tazalyq mádenıetine qatysty oıyn tyńdady. Resmı jıyndardaǵydaı emes, ashyq formattaǵy áńgimede jumysshylar óz usynystary men máselelerin búkpesiz jetkizdi.
Tazalyq jumystary aıaqtalǵan soń kezdesý aq dastarhan basynda jalǵasty. Tańǵy as ústinde áńgime tek komýnaldyq sala tóńireginde órbigen joq. Qatysýshylar óńirdiń damýy, kóshelerdiń tazalyǵy, otbasy, bala tárbıesi, kúndelikti ómir men eńbek adamdarynyń qoǵamdaǵy orny týraly da oı almasty.
Komýnaldyq qyzmetkerler mundaı kezdesýden erekshe áser alǵanyn jasyrmady. Olar, qarapaıym jumysshylarǵa kóńil bólip, ýaqyt tapqan oblys basshysyna rızashylyqtaryn bildirdi.
Kezdesý sońynda komýnaldyq qyzmetkerlerge estelik syılyqtar tabystalyp, kóshe tazalyǵyna jaýapty jumysshylarǵa ákim alǵys aıtty.
«Óńirdiń taza ári jaıly bolýy – sizderdiń kún saıyn atqaryp júrgen jaýapty qyzmetterińizdiń nátıjesi. “Taza Qazaqstan” tujyrymdamasy elimizdiń Konstıtýsıasynda belgilengen negizgi qaǵıdattardyń biri. Qorshaǵan ortany, týǵan jerimizdi taza ustaý barshamyzdyń mindetimiz. Osy maqsatta atqaryp júrgen eńbekterińiz úshin Sizderge shynaıy alǵysymdy bildiremin», – dedi oblys ákimi.
Aıta keteıik, Almaty oblysynda ár apta saıyn “Taza beısenbi” sharasy turaqty túrde uıymdastyrylady. Oǵan turǵyndar, bıznes ókilderi, jastar, qoǵam belsendileri men memlekettik mekeme qyzmetkerleri qatysýda. Al, eńbek adamdarynyń qoǵamdaǵy mártebesin arttyrý, ekologıalyq mádenıetti nyǵaıtý jáne jergilikti bılik pen turǵyndar arasyndaǵy ashyq dıalogty damytýǵa baǵyttalǵan búgingideı kezdesýler aldaǵy ýaqytta da jalǵasyn tappaq. Bul-kommýnaldyq sala qyzmetkerleriniń usynystary men máselelerin tikeleı tyńdap, olardyń eńbegine qurmet kórsetýge múmkindik beredi.
