Qytaı bıligi Álimnur Turǵanbaıdyń ustalǵanyn rastady, dep habarlaıdy Azattyq radıosy. Buǵan deıin Álimnur Turǵanbaıdyń áıeli onyń Qytaıǵa baryp, joǵalyp ketkenin habarlap, Qazaqstan bıliginen kómek suraǵan edi.
Qytaı jaǵy Qazaqstan bıligine joldaǵan jaýabynda Álimnur Turǵanbaıdyń áli de Qytaı azamaty ekenin, Qytaıda qos azamattyq tanylmaıtyndyǵyn atap ótken. Jýyrda Qazaqstannyń Qytaıdaǵy konsýldyǵynan jaýap alǵan Álimnur Turǵanbaıdyń áıeli Gúldárıa Sherızat Azattyqqa konsýldyqtyń bergen jaýabyn kórsetti.
"Qytaılyq tarappen ótkizilgen tıisti kelissózdiń nátıjeleri boıynsha 2025 jyldyń 11 tamyzynda Qytaı qoǵamdyq qaýipsizdik mınıstrligi halyqaralyq yntymaqtastyq basqarmasy Qytaıdyń “Azamattyq týraly” zańynyń erejelerine sáıkes, Álimnur Turǵanbaı Qytaı azamattyǵynan shyǵýǵa ruqsat almaǵanyn jáne Qytaı azamattyǵynan avtomatty túrde aıyrylý sharttaryna sáıkes kelmeıtinin habarlady. Osyǵan baılanysty ol áli kúnge deıin QHR azamaty mártebesin saqtap otyrǵanyn jetkizip, Qytaıda qos azamattyq tanylmaıtyndyǵyn atap ótkenin jetkizemiz” dep jazylǵan konsýldyq jaýabynda.
