Bul kezdesýdiń negizgi maqsaty – uly oıshyldyń rýhanı murasyn keńinen nasıhattap, stýdentter men jas ǵalymdardy ǵylymǵa, izdeniske, jańa ıdeıalarǵa yntalandyrý.
İs-shara barysynda ál-Farabıdiń álemdik órkenıet úshin mańyzyn aıqyndaıtyn eńbekteri, onyń fılosofıalyq oı-tolǵamdary, parasat pen izgilikti tý etken dúnıetanymy keńinen talqylandy. Ál-Farabı – tek óziniń dáýirinde ǵana emes, qazirgi sıfrlyq transformasıa kezeńinde de adamzattyń rýhanı baǵdaryn aıqyndaýshy kemeńger. Onyń rasıonaldyq oılaýdy, bilim men adamgershilikti úılestirgen ıdeıalary HHİ ǵasyrda gýmanızm men ıntellektýaldyq mádenıettiń negizine aınalýda.
Kezdesýge ýnıversıtettiń jetekshi profesor-oqytýshylary, doktoranttar, magıstranttar, sondaı-aq «Farabıtaný» baǵyty boıynsha ǵylymı zertteý júrgizip júrgen jas ǵalymdar qatysty. Sharany «Ál-Farabı» ǵylymı-zertteý ortalyǵy men ýnıversıtettiń ǵylymı-ınnovasıalyq qyzmet jónindegi departamenti birlese uıymdastyrdy. Jıynda «Farabıtanýdyń» qazirgi ǵylymı baǵyttary, oıshyldyń fılosofıalyq, pedagogıkalyq jáne áleýmettik kózqarastarynyń zamanaýı ǵylymmen baılanysy jan-jaqty taldandy.
«Ál-Farabı» ǵylymı-zertteý ortalyǵynyń dırektory, saıasattaný ǵylymdarynyń kandıdaty, qaýymdastyrylǵan profesor Pirimbek Muhanbetuly Súleımenov óz sózinde: «Farabı murasy – tek ótkenniń jádigeri emes, ol – búgingi jáne bolashaq urpaqtyń rýhanı jáne ǵylymı baǵdarshamy. Ýnıversıtetimizdiń mısıasy – osy murany zamanaýı ǵylymmen ushtastyra otyryp, bilim men mádenıettiń jańa kókjıegin ashý», - dep atap ótti.
Kezdesý barysynda qatysýshylar Farabı eńbekterin zertteýdegi tájirıbelerimen bólisti. Osyndaı aýqymdy ári mańyzdy sharanyń ótkizilýi – ýnıversıtettiń óz mısıasyna, ıaǵnı uly ǵalymnyń ıdeıalaryn zertteý, dáripteý jáne ómirge engizý ustanymyna adaldyǵynyń kórinisi. Bul kezdesý jas urpaqtyń ǵylymǵa degen qyzyǵýshylyǵyn arttyryp, rýhanı sabaqtastyqty nyǵaıtyp qana qoımaı, «Farabıtaný» ilimin álemdik deńgeıge shyǵarýǵa jańa serpin beredi.
Ál-Farabı atyndaǵy Qazaq ulttyq ýnıversıteti
Fılosofıa jáne saıasattaný fakúltetiniń
Pedagogıka jáne bilim berý menedjmenti kafedrasynyń 2 kýrs doktoranty Amırkanov M.B.
