2025 jylǵy 29 qazanda Májilistiń jalpy otyrysynda «Aq jol» fraksıasynyń depýtattary qazaq ádebıetiniń damýy jáne memleket pen ádebıet arasyndaǵy rýhanı dıalogtyń qajettiligi týraly saýal joldaǵan bolatyn. Osyǵan oraı Qazaqstan Jazýshylar odaǵy resmı málimdeme jasady.
Málimdemede Odaq depýtat Qazybek Isa kótergen máselelerdiń basym bóligi buǵan deıin Jazýshylar odaǵy tarapynan birneshe ret kóterilip, keıbiri júzege asyp jatqanyn atap ótti. 2023 jyly Memleket basshysy Qasym-Jomart Toqaev Jazýshylar odaǵynyń tóraǵasy Mereke Qulkenovti qabyldaǵanda da osy taqyryptar qozǵalǵan. Prezıdent jas qalamgerlerge erekshe kóńil bólip, memleket tarapynan qoldaý sharalary jalǵasatynyn aıtqan edi. Bul baǵyttaǵy jumystar búginde turaqty túrde júrgizilip keledi.
Jyl saıyn berilip kele jatqan memlekettik «Daryn» jastar syılyǵy, Prezıdenttiń arnaýly ádebı syılyǵy jáne «Aıboz» ulttyq ádebı syılyǵy – osynyń aıǵaǵy. Jazýshylar odaǵy el rýhanıatynyń tiregi retinde ulttyq ádebıetti damytýda, qalamgerler býynynyń sabaqtastyǵyn qamtamasyz etýde mańyzdy ról atqaryp otyr. Uıym Prezıdent Ákimshiligimen, Úkimetpen, Mádenıet jáne aqparat mınıstrligimen, óńirlik ákimdiktermen jáne shet memlekettermen birqatar jobalardy júzege asyryp keledi. Sondyqtan «quzyrly oryndar ádebıetke nemquraıly qaraıdy» degen pikir orynsyz dep sanalady.
Sondaı-aq Odaq depýtattyń «Úkimet pen ádebıet arasyndaǵy mádenı únqatysýdy júıeli dıalogtik platforma retinde bekitý» týraly usynysyna qatysty óz ustanymyn bildirdi. Málimdemede: «Qalamger qaýymy bılikpen dıalog júrgizýmen ýaqyt ótkizse, ádebıetti kim jasamaq?» – delingen.
Jazýshylar odaǵy qazaq ádebıetiniń bolashaǵyn jas býynmen baılanystyryp, jas talanttardy qoldaý men ádebı úderisti jańa baǵytta damytýǵa basymdyq berip otyr. «Qazaqstan Jazýshylar odaǵy músheligine úmitker» jobasy aıasynda 20 jasqa deıingi jastarǵa arnalǵan baıqaýlar, sheberlik sabaqtary men ádebı keshter ótkizilip keledi. Balalar ádebıetin damytý maqsatynda halyqaralyq «Ertóstik» ádebı syılyǵy taǵaıyndalǵan. Budan bólek, byltyr Almatyda ótken «Almatynyń jas jazýshysy» jobasy endigi jyldan bastap Oqý-aǵartý mınıstrliginiń qoldaýymen búkil respýblıka boıynsha «Qazaqstannyń jas jazýshysy» ataýymen jalǵasyn tabady.
2024–2025 jyldary QR Mádenıet jáne aqparat mınıstrligimen birlesip, úsh iri joba iske asyrylǵan: «Jańa Qazaqstannyń ádebı-tanymdyq panoramasy», «Jazýshylardyń ádebı sheberlik mektebi» jáne «TMD elderiniń arhıvterindegi qazaqstandyq jazýshylar týraly zertteý jumystary». Sońǵy joba aıasynda qazaq ádebıeti ınstıtýtyn ashý baǵytyndaǵy jumystar júrgizilip jatyr.
Qazirgi qazaq ádebıetinde zamanaýı adamnyń beınesin beıneleıtin shyǵarmalar jetkilikti ekeni de aıtyldy. Bul – byltyr jaryq kórgen 20 kitap pen bıyl jaryq kóretin taǵy 20 eńbekten anyq kórinedi. 2026 jyldan bastap Odaq «Túrki áleminiń ádebıeti» jobasyn júzege asyrýdy josparlap otyr. Joba aıasynda túrki elderiniń úzdik týyndylary qazaq tiline aýdarylyp, otandyq oqyrmanǵa usynylady. Bul baǵyttaǵy jumys Ázirbaıjan, Qyrǵyzstan jáne Ózbekstan Jazýshylar odaqtarymen qol qoıylǵan memorandýmdar arqyly bastalyp ketken.
Sonymen qatar, Jazýshylar odaǵy janyndaǵy proza, poezıa, balalar ádebıeti, ádebı syn, dramatýrgıa, aýdarma, detektıv jáne jastar keńesteri ádebıettiń jan-jaqty damýyna serpin berip otyr.
Málimdemeniń sońynda Odaq Basqarmasy depýtattyq saýalda kóterilgen máselelerdiń uıymnyń kún tártibimen tolyq úndesetinin atap ótti. «Qazaq ádebıeti – irgetasy berik, rýhanı qýaty zor, bolashaǵy jarqyn ádebıet. Biz ádebıetti damytý isinde memleketpen birlese jumys isteýdi, jas qalamgerlerge qoldaý kórsetýdi jáne ulttyq rýhanıatty jańǵyrtýdy basty mindetimiz dep bilemiz. Qazaq ádebıeti – ult rýhynyń aınasy. Ony damytý – barshamyzdyń ortaq paryzymyz!» – delingen málimdemede.
