Almaty qalasy ákiminiń orynbasary Abzal Núkenov Memleket basshysynyń atynan aqyn, Qazaqstannyń halyq jazýshysy Marfýǵa Aıtqojınany 90 jasqa tolǵan mereıtoıymen quttyqtady.

Abzal Núkenov Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn tabystady.

«Kórnekti aqyn, qoǵam qaıratkeri ári erekshe daryn ıesi retinde Siz halqymyzdyń zor qurmetine bólendińiz. Mazmundy da ónegeli ǵumyryńyzdy ulttyq ádebıet pen mádenıetti damytýǵa, qazaq poezıasynyń kókjıegin keńeıtýge arnadyńyz. Úzdiksiz izdenis pen shabytqa toly kópjyldyq shyǵarmashylyq eńbegińiz mol jemisin berip, ár jyldary jaryq kórgen kitaptaryńyz ulttyń rýhanı murasynyń altyn qoryn tolyqtyrdy», — delingen Memleket basshysynyń quttyqtaýynda.

Qala basshylyǵynyń atynan Abzal Núkenov mereıtoı ıesine kópjyldyq eńbegi úshin shynaıy rızashylyq bildirdi. Ol Marfýǵa Aıtqojınanyń shyǵarmashylyǵy ulttyq qundylyqtarǵa qyzmet etýdiń úlgisine aınalǵanyn, al poezıasy aqynnyń azamattyq ustanymyn aıqyn tanytatynyn atap ótti.

Marfýǵa Aıtqojınanyń esimi qazaq ádebıetiniń tarıhynda aıryqsha oryn alady. Onyń shyǵarmalary ulttyq poezıanyń altyn qoryna enip, oqyrman súıispenshiligine bólendi jáne birneshe býyn úshin rýhanı baǵdarǵa aınaldy. Ol ondaǵan jyl boıy qazaq poezıasynyń damýyna, mádenı murany saqtaýǵa jáne qoǵamnyń rýhanı qundylyqtaryn nyǵaıtýǵa zor úles qosyp keledi.