Halyqaralyq jastar kúnine oraı Almaty oblysynyń ákimi Marat Sultanǵazıev Talǵar aýdanyndaǵy «SAN Tyres Kazakhstan» kompanıasynyń logıstıkalyq ortalyǵyna baryp, ondaǵy múmkindiktermen tanysty. Kásiporyn eńbek jolyn endi bastaǵan jastarǵa qoldaý bildirip, jumyspen qamtyp otyr. Qazirgi tańda munda 170-ke jýyq adam eńbek etedi. Onyń jartysynan kóbi – jastar. Sondaı-aq aldaǵy ýaqytta óńirdiń NEET sanatyndaǵy 100 azamatyn eńbekke tartýdy josparlaýda. Osyǵan oraı búgin Almaty oblysynyń ákimdigi men atalmysh kompanıa arasynda ózara yntymaqtastyq týraly memorandýmǵa qol qoıyldy, – dep habarlaıdy Almaty oblysy ákiminiń baspasóz qyzmeti.

Júzdesý barysynda aımaq basshysy qatysýshylardy 12 tamyz – Halyqaralyq jastar kúnimen quttyqtady. Búginde Almaty oblysyndaǵy jastardyń sany 432 myńnan asady. Bul – óńir halqynyń 28%-y. Marat Eleýsizulynyń aıtýynsha, sońǵy jyldary jastar saıasatyn ilgeriletýge erekshe kóńil bólingen. Onyń ishinde shalǵaı aýyldardaǵy jas býyn da nazardan tys qalmaǵan. Atap aıtqanda, sońǵy 3 jylda Kegen, Balqash, Raıymbek jáne Qarasaı aýdandarynda jastar resýrstyq ortalyǵynyń jańa ǵımarattary paıdalanýǵa berildi. Qonaev qalasynda zamanaýı kovorkıng-ortalyq ashyldy. İle, Uıǵyr jáne Talǵar aýdandarynda jastarǵa arnalǵan kovorkıng keńistikter quryldy. Memleket basshysy belgilegen «Zań men tártip», «Taza Qazaqstan» qaǵıdattary aıasyndaǵy jobalarǵa da erekshe kóńil bólinýde. Qazirgi tańda oblysta 3 myńnan astam belsendi erikti bar. Olar qaıyrymdylyq aksıalaryna, ekologıalyq jumystarǵa, qoǵamdyq bastamalarǵa turaqty qatysyp keledi.

Marat Eleýsizuly óz sózinde «SAN Tyres Kazakhstan» kompanıasy jas mamandardyń kásibı damýyna jan-jaqty jaǵdaı jasap otyrǵanyn erekshe atap ótip, kásiporyn ujymyna alǵys aıtty.

«Jastarǵa jaǵdaı jasaý – bizdiń basty baǵyttarymyzdyń biri. Al kásipkerlerdiń jas mamandardyń áleýetin ashatyn bastamalarǵa qoldaý bildirýi – úlken áleýmettik jaýapkershilik. Biz mundaı seriktestikti aldaǵy ýaqytta da nyǵaıta túsýge múddelimiz. Sebebi jastardy jumyspen qamtý máselesin tek memlekettik baǵdarlamalar arqyly sheshý múmkin emes. Óndiris, bıznes, bilim berý uıymdary jáne memlekettik organdar bir baǵytta jumys istegende ǵana naqty nátıje bolady», – dedi aımaq basshysy.

«SAN Tyres» kompanıasy Qazaqstan naryǵynda 20 jyl boıy tabysty jumys istep keledi. Jyl saıyn memleket búdjetine 10 mlrd teńgeden astam salyq tóleıdi. Talǵar aýdanynda ornalasqan «SAN Baiserke» logıstıkalyq qoımasy – TMD-daǵy eń iri keshen. Munda jylyna 3,5 mıllıonǵa deıin shına qabyldap, saqtap jáne jóneltýge bolady. Iaǵnı Almaty oblysynan elimizdiń túkpir-túkpirine, Orta Azıa elderi men alys-jaqyn shetelderge kólik dóńgelegi úzdiksiz jiberiledi.

Logıstıkalyq habtyń jalpy aýmaǵy – 23 gektar. Munda zamanaýı qoımalarmen qatar keńseler, dóńgelek aýystyrý jáne servıs ortalyǵy bar. Qyzmetkerlerdiń áleýmettik jaǵdaıyna da erekshe kóńil bólingen. Qoımanyń janynda 200 oryndy jataqhana, asqana, demalys bólmeleri, kitaphana men sport alańy bar. Jumysshylardyń densaýlyǵy men jaıly demalysy úshin 130 sotyq jerge saıabaq ta qarastyrylǵan. Bolashaqta qyzmetkerler men olardyń otbasyna arnalǵan SAN Village turǵyn úı kesheni salynyp, balabaqsha ashý kózdelip otyr.

«Almaty oblysynda buǵan deıin de jumys istegenbiz. Dál Talǵar aýdanynda alǵash ret iske kiristik. «SAN Tyres»-te 300-den astam adam eńbek etedi. 2028 jylǵa qaraı olardyń sanyn 1000-nan asyramyz dep josparlap otyrmyz. Kompanıamyz jastardan quralǵan. Elimizdiń kórkeıýi men damýy jas urpaqtyń qolynda. Sondyqtan olarǵa arnalǵan áleýmettik qoldaý sharalary kóp. Sonyń biri – «Meniń armanym» jobasy. Bul bastama boıynsha jastar óz armanyn jazyp, bizge joldaıdy. Qazirge deıin 150-den astam jastyń armany oryndaldy», – deıdi «SAN Tyres Kazakhstan» kásipornynyń basshysy Syrymbek Taý.

Shara barysynda kásiporynnyń úzdik qyzmetkerleri men óńirdiń órkendeýine úles qosyp júrgen jas mamandar marapattaldy. Sondaı-aq olar oblys ákimimen jáne kompanıa basshysymen «Taza Qazaqstan» ekologıalyq baǵdarlamasy aıasynda kásiporyn aýmaǵyndaǵy saıabaqqa aǵash kóshetterin otyrǵyzdy. Osylaısha, aıtýly kún qarsańynda jumysshy jastardyń eńbegi dáriptelip, aıtýly kúnniń mán-mańyzy da aıqyndala tústi.

Aıta keteıik, Halyqaralyq jastar kúni Almaty oblysynda keń aýqymda atalyp ótýde. Óńirdiń túkpir-túkpirinde jas býynnyń bastamalary men jetistikterin qoldap, zıatkerlik áleýeti men ekologıalyq mádenıetin arttyrýǵa arnalǵan 30-dan astam shara ótýde. Oǵan 20 myńǵa jýyq jas qatysýda. Sharalar legi tamyz aıynyń sońyna deıin jalǵasady.