«Almaty qupıalary» anımasıalyq serıaly – Almatynyń búgini men bolashaǵy týraly qyzyqty joba
Almaty TV Qala kúni qarsańynda jasandy ıntellekt tehnologıalaryn qoldana otyryp jasalǵan «Almaty qupıalary: Aılın men Barys» atty tól anımasıalyq jobasyn usynady.
Basty keıipkerler — Aılın men Barys qyzyqty oqıǵalarǵa toly saıahatqa attanyp, kórermenderdi Almaty qalasymen, onyń baı tarıhymen, biregeı mádenıetimen jáne zamanaýı kelbetimen tanystyrady.
«Almaty qupıalary» — tek jarqyn ári qyzyqty kontent emes, sonymen qatar mańyzdy aǵartýshylyq bastama. Joba otbasylyq qundylyqtardy, týǵan jerge degen súıispenshilikti, ekologıalyq mádenıetti jáne azamattyq ustanymdy dáripteýge baǵyttalǵan.
Mýltserıaldyń sújettik jelilerine Memleket basshysynyń bastamasymen júzege asyrylyp jatqan «Taza Qazaqstan», «Ádiletti Qazaqstan», «Zań men tártip», «Amandasý» jáne «Jeńimpaz ult» jalpyulttyq baǵdarlamalary men tujyrymdamalary engizilgen.
Keıipkerlerdiń oqıǵalary arqyly jas kórermender zańdy qurmetteýdiń, qoǵam aldyndaǵy jaýapkershiliktiń, salaýatty ómir saltynyń mańyzyn túsinedi, sondaı-aq jaıly qalalyq ortany damytý men el ıgiligi jolyndaǵy jasampaz eńbek týraly biledi.
Balalar men otbasylyq aýdıtorıaǵa arnalǵan mýltserıal — Almaty TV komandasy ázirlegen biregeı ónim. Ideıadan bastap senarı jazý, keıipkerlerdi ázirleý, anımasıa jasaý, dybystaý, mýzykalyq árleý jáne fınaldyq montajǵa deıingi barlyq óndiristik sıkldi telearna ujymy óz kúshimen júzege asyrdy. Bul rette jasandy ıntellekt zamanaýı óndiristik qural retinde qoldanyldy.
Mýltserıaldy jasaýǵa telearna qyzmetkerlerin Memleket basshysynyń Qazaqstan tarıhyn balalar men jastarǵa anımasıalyq fılmder arqyly keńinen nasıhattaý tapsyrmasy, sondaı-aq Sıfrlandyrý jyly aıasynda Almaty TV óndiristik qyzmetine jasandy ıntellekt quraldaryn belsendi engizý úderisi yntalandyrdy.
Jasandy ıntellekt tehnologıalarynyń, tartymdy sújettiń jáne harızmasy joǵary keıipkerlerdiń úılesimi jańa mýltserıaldy óskeleń urpaqty tárbıeleýdiń jáne Qazaqstannyń mádenıeti men bolashaǵyna qyzyǵýshylyq qalyptastyrýdyń mańyzdy quraldarynyń birine aınaldyrady.
Alǵashqy bólimderi telearnanyń efırinde jáne áleýmettik jelilerinde osy senbi, 19 qyrkúıek kúni saǵat 10:00-de kórermenge jol tartady.
1-bólim: «Qupıa alma»: Aılın men Barystyń bastan keshken oqıǵalary arqyly balalar Almatynyń tarıhy men mádenı murasy, sondaı-aq dástúrli «Amandasý» ádebiniń mańyzy týraly biledi.
2-bólim: «Altyn adam»: Bul bólim el tarıhyna degen qurmetti qalyptastyryp, «Jeńimpaz ult» rýhyn asha otyryp, adal, batyl ári optımıs bolýǵa tárbıeleıdi.
3-bólim: «Kúmis tıyn»: Almatynyń kópǵasyrlyq tarıhy týraly qyzyqty oqıǵa arqyly adal eńbektiń, adaldyq pen ózara qurmettiń qundylyǵyn baıandap, Memleket basshysynyń «Zań men tártip» tujyrymdamasyn túsindiredi.
4-bólim: «Tazalyq saqshylary»: Aılın men Barys Almatynyń tazalyǵy men kórkine qamqorlyq jasaıtyn myńdaǵan adamnyń kúndelikti eńbegimen tanysady. Bólim týǵan qalaǵa degen súıispenshilikti arttyryp, «Taza Qazaqstan» tujyrymdamasynyń mańyzdylyǵyn kórsetedi.
5-bólim: «Juldyzdyń jumbaǵy»: Bul bólimde ádildik, ózara kómek pen qamqorlyq taqyryby kóteriledi. Bas keıipkerler Aılın men Barys meıirimdi, baýyrmal bolýdy jáne qıyn jaǵdaıǵa tap bolǵandarǵa qoldaý kórsetýdi úırenip, Prezıdenttiń «Ádiletti Qazaqstan» bastamasynyń mańyzyn aıqyn kórsetedi.
Eske sala keteıik, buǵan deıin Almaty TV sońǵy jyldardaǵy eń aýqymdy telemaýsymdardyń biri bolatyn jańa televızıalyq maýsymnyń bastalǵanyn jarıalaǵan bolatyn. Kórermenderdi súıikti baǵdarlamalarmen qatar jańa jarqyn jobalar men otandyq telehıkaıalardyń premersy kútedi.
Olardyń qatarynda «Tańǵy studio», «Almatınskıe ıstorıı», «Arhıtektor», «Vechernıı Almaty», «DODA» jáne «Ádildik alańy» baǵdarlamalary men shoýlary, sondaı-aq «Kórshiler», «Balam», «Erikti», «Túngi qala», «Aq kelin» jáne «Jolaýshy» telehıkaıalary bar.
Jańa maýsymda telearna «Jańalyqtar»baǵdarlamasynyń jańartylǵan nusqasyn usynady. Baǵdarlama tyń tujyrymdama men aqparat berýdiń zamanaýı formatynda efırge shyǵady. Máselen, Memleket basshysynyń «Jeńimpaz ult» bastamasy aıasynda jas qazaqstandyqtardyń tabys tarıhyna, el turǵyndarynyń jetistigine, jasampaz eńbek, azamattyq jaýapkershilik jáne qoǵamdy damytýǵa qosqan jeke úlesi men úlgisine arnalǵan arnaıy aıdar daıyndalady.
Almaty TV-diń jańa maýsymy — ıgi isterge shabyttandyratyn zamanaýı keıipkerler týraly oqıǵalar, ǵylymdy, týrızmdi, ekologıany jáne otbasylyq qundylyqtardy nasıhattaıtyn jobalar, sondaı-aq kórermenderdi Almaty men búkil Qazaqstannyń tynys-tirshiligimen tanystyrýdy jalǵastyratyn mazmundy kontent.
