«Kitap oqıtyn ult» respýblıkalyq jobasyna qatysýǵa mıllıonnan astam qazaqstandyq tirkeldi. Joba Memleket basshysy Qasym-Jomart Toqaevtyń «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyǵyn oryndaý aıasynda júzege asyrylyp jatyr.

Qatysýshylar baıqaýdyń jeti baǵytynyń birin tańdaı alady. Tirkelgennen keıin olar alty aı ishinde 15 kitap oqyp, uıymdar, aýdandar, qalalar men óńirler deńgeıinde ótetin birneshe irikteý kezeńinen ótedi. Óńirlik kezeńdegi saıys komandalyq formatta uıymdastyrylady.

QR Mádenıet jáne aqparat mınıstri Arman Qyryqbaev qazaqstandyqtardyń jobaǵa zor qyzyǵýshylyq tanytyp otyrǵanyn atap ótip, kitap oqý mádenıetin damytý barshaǵa ortaq mindet ekenin aıtty. Nebári eki aptanyń ishinde mıllıonnan astam adamnyń tirkelýi bul bastamanyń halyq arasynda úlken qyzyǵýshylyq týdyrǵanyn kórsetedi.

Óńirlik kezeńniń qorytyndysy boıynsha tórt myńǵa jýyq qatysýshy «Jyl oqyrmany» ataǵy úshin jarysty jalǵastyrady. Óńirlik irikteýde júldeli oryn alǵan qatysýshylarǵa aqshalaı syılyq beriledi: birinshi orynǵa – 600 myń teńge, ekinshi orynǵa – 450 myń teńge, úshinshi orynǵa – 300 myń teńge.

Kelesi kezeńde qatysýshylar esse jazyp, oqyǵan shyǵarmalary boıynsha tanystyrylym jasaıdy jáne sarapshylar alqasynyń aldynda sóz sóıleıdi. Osy kezeńniń qorytyndysy boıynsha ár óńirden on úzdik oqyrman anyqtalady.

Astanada ótetin respýblıkalyq fınalǵa elimizdiń 20 óńirinen 200 adam qatysady. Olar testileýden ótip, baıqaý tapsyrmalaryn oryndaıdy jáne qazylar alqasynyń aldynda sóz sóıleıdi. Fınal qorytyndysy boıynsha Qazaqstannyń úzdik on oqyrmany anyqtalady. Olardyń árqaısysy 10 mıllıon teńge kólemindegi bas júldege ıe bolady.