Almaty qalasynyń Almaly aýdandyq sotynda Sanjar Boqaev, onyń jıeni Madıar Qalmenov jáne jeke mobılografy Ulan Núsipqojaǵa qatysty qylmystyq is boıynsha kezekti sot otyrysy bastaldy. Sottalýshylarǵa alaıaqtyq jasaý, qylmystyq jolmen alynǵan kiristerdi zańdastyrý, urlyq, aǵashtardy zańsyz kesý jáne kórineý jalǵan aqparat taratý boıynsha aıyptar taǵylǵan.
Sotta kýágerlerden jaýap alý jalǵasyp jatyr. Atap aıtqanda, «QazTransGaz» kásipodaǵynyń 42 mıllıon teńgeden astam qarajatyn jymqyrýǵa qatysty qarjylyq epızodtar qaralýda.
Buǵan deıingi sot otyrystarynda Boqaevtyńavtokerýen uıymdastyrýdaǵy, merdigerlerdi tańdaýdaǵy jáne bólingen qarjyny basqarýdaǵy onyń róline qatysty birqatar derek aıtyldy.
«QazTransGaz» AQ-nyń burynǵy bas dırektory Rýstam Súleımanovtyń aıtýynsha, Boqaev kompanıada óz betinshe áreket etken. Ol basshylyqpen kelispesten óz betinshe sheshim qabyldap, avtokerýendi uıymdastyrý jumystaryna jeke ózi jetekshilik etken. Al Boqaevty bas dırektordyń keńesshisi qyzmetine Qaırat Sháripbaevtyń ózi taǵaıyndaǵan. Súleımanovtyń sotta bergen jaýabyna qaraǵanda, kompanıa basshylyǵy aýysqannan keıin de Boqaev burynǵy artyqshylyqtaryn saqtap qalǵan. Ol is júzinde qalyptasqan qyzmettik baǵynystylyq tártibinen tys áreket etip, atqaryp júrgen jumysynyń egjeı-tegjeıin jańa basshylyqqa baıandaýdy qajet dep sanamaǵan kórinedi.
Kompanıanyń baspasóz qyzmetiniń burynǵy basshysy Beksultan Qurmanquldyń aıtýynsha, Boqaev merdigerlerdi ózi alyp kelip, aldyn ala daıyndalǵan shyǵyn smetalaryn usynǵan. Al kásipodaq komıteti otyrysynyń hattamasyna máseleler is júzinde talqylanbastan, tek formaldy túrde qol qoıylǵan.
Taǵy bir kýáger, «MLS-Group» JSHS-niń burynǵy dırektory Jarmuhamed Sultanov túsirilmegen derekti fılm úshin Boqaevqa 12,3 mıllıon teńgeni qolma-qol bergenin málimdedi. Onyń sózinshe, jarnamalyq qyzmetter úshin túsken qarajattyń bir bóligi Boqaevtyń jıhaz kásibin damytýǵa jumsalǵan.
Buǵan deıin kásipodaqtyń burynǵy tóraıymy Zaýresh Mahanova da merdiger kompanıalardy Boqaevtyń ózi usynǵanyn aıtqan bolatyn. Onyń málimdeýinshe, Boqaevtyń jıeni kelisimsharttardy aldyn ala ázirlep, tıisti somalaryn kórsetip, qol qoıýǵa daıyn kúıinde ákelip otyrǵan.
