Memlekettiliktiń qalyptasý tarıhynda aıryqsha orny bar Respýblıka kúni bıyl da Almaty oblysynda erekshe saltanatpen atap ótildi. Óńirdiń barlyq aýdan-qalasynda Memlekettik Tý kóterý rásimderi uıymdastyrylyp, merekelik konsertter men túrli patrıottyq is-sharalar ótti.
Ulttyq merekege arnalǵan negizgi saltanatty sharalardyń biri oblys ortalyǵy Qonaev qalasynda uıymdastyryldy. Oǵan Almaty oblysynyń ákimi Shyńǵys Árinov bastaǵan óńir aktıvi, oblystyq basqarmalardyń basshylary, zıaly qaýym ókilderi, quqyq qorǵaý organdarynyń qyzmetkerleri, qoǵamdyq uıym músheleri, jastar jáne qala turǵyndary qatysty.
Saltanatty jıyn Memlekettik Týdy kóterý rásimimen bastaldy. Kók baıraq kókke kóterilgen sátte jınalǵan kópshilik Qazaqstan Respýblıkasynyń Memlekettik Gımnin birge shyrqady. El táýelsizdigi men tutastyǵyn dáriptegen bul rásim merekeniń mańyzyn aıshyqtaı tústi.
Oblys ortalyǵyndaǵy saltanatty sharaǵa 2 myńnan astam adam jınaldy. Qoldaryna kók baıraq ustaǵan turǵyndar eldik pen birliktiń, beıbitshilik pen turaqtylyqtyń mańyzyn pash etti. Túrli etnos ókilderi men jastardyń merekege belsendi qatysýy qoǵamdaǵy tatýlyq pen ózara qurmettiń kórinisine aınaldy.
Bıylǵy mereke Almaty oblysynda tek saltanatty jıyndarmen ǵana shektelgen joq. Óńirdiń áleýmettik-ekonomıkalyq damýyna serpin beretin birqatar mańyzdy nysan paıdalanýǵa berildi.
Oblys boıynsha Respýblıka kúnine oraı 250-ge jýyq is-shara ótkizilip, 28 jańa nysannyń ashylýy turǵyndar úshin merekelik tartýǵa aınaldy.
Merekelik baǵdarlamalar oblystyń barlyq aýdan-qalasyn qamtydy. Mádenıet mekemelerinde konsertter, patrıottyq kezdesýler men tanymdyq sharalar uıymdastyrylyp, turǵyndarǵa merekelik kóńil kúı syılady.
Qonaev qalasyndaǵy saltanatty jıyn oblys ónerpazdarynyń konserttik baǵdarlamasymen jalǵasty. Kópshilik ónerpazdarǵa qosylyp, patrıottyq shyǵarmalardy birge oryndady.
Almaty oblysynda uıymdastyrylǵan merekelik is-sharalar da osy qundylyqtardy nasıhattaýǵa baǵyttaldy. Ásirese, jastardyń belsendi qatysýy óskeleń urpaqtyń boıynda otansúıgishtik sezimdi qalyptastyrýdyń mańyzyn kórsetti.
Óńirde keń kólemde atap ótilgen Respýblıka kúni el tarıhyna qurmet kórsetip, táýelsizdiktiń qadirin uǵyndyratyn, qoǵamdy ortaq maqsatqa jumyldyratyn mańyzdy merekelik oqıǵaǵa aınaldy.
