Qoǵam belsendisi Abzal Dostıar óziniń áleýmettik jelidegi resmı paraqshasynda Qyzylorda qalasyndaǵy jazasyn óteý mekemesinde otyrǵan jýrnalıs Dýman Muhametkárimniń qazirgi jaǵdaıyna baılanysty mańyzdy aqparatpen bólisti.
Buǵan deıin jýrnalıs Dýman Muhametkárim óziniń zańdy quqyqtaryn talap etip, Qyzylordadaǵy mekemeden Almaty oblysy aýmaǵyndaǵy jazasyn óteý mekemesine aýystyrýdy suraǵan bolatyn. Qoldanystaǵy zańnamaǵa sáıkes, sottalǵan azamattyń jazasyn óziniń nemese jaqyndarynyń turǵylyqty jerine jaqyn aýmaqta óteýge tolyq quqyǵy bar. Alaıda, bul talaptyń ýaqytyly oryndalmaýyna baılanysty jýrnalıs óziniń densaýlyǵyna zıan keltiretin tótenshe áreketterge (denesine zaqym keltirý, ashtyq jarıalaý) barýǵa májbúr bolǵan edi. Onyń osy mazmundaǵy ashyq hatyn budan buryn qoǵam belsendisi Abzal Dostıar óz paraqshasynda jarıalaǵan bolatyn.
«Men Muhamedkárim Dýman Almasuly. Qyzylordadaǵy 60-shy mekeme karserinde otyrǵanyma 1 jyl 8 aı boldy.
19.12.2024-shi jyldan beri 8 sharshy metr qapastan shyqqan emespin.15.07.2026 jyly, sársenbi kúni, saǵat 11:25-te eki ýys, 11:45-te taǵy bir ýys dáriler iship aldym.
Dárini qapastaǵy kamera aldynda kórsetip ishtim. Aýrýhanaǵa aparyp 15:30-da ishimdi jýdy. Biraq tirkemedi.
20.07.2026 jyly (dúısenbi) saǵat 17:00-de 6 (alty) túımedeı batareıa, ottyq, t.b. zattar juttym.
Otadan aman qalsam, budan da zorǵy áreketterge baramyn.
Talabym: zańǵa sáıkes Almaty túrmesine aparsyn!»
Bul Dýman Muhamedkárimniń túrmeden jazǵan haty. (Aqparat Abzal Dostiyar-dyń paraqshasynan alyndy.) Atalǵan hattan keıin qoǵam belsendileri men Dýmandy qoldaýshy top, sonyń ishinde Abzal Dostıar jáne Qoıshybek Múbarák jaǵdaıdy ornynda tanysý jáne sheshý maqsatynda arnaıy Qyzylorda qalasyna bardy. Sapar barysynda belsendiler mekeme ákimshiligimen, tıisti quqyq qorǵaý jáne qylmystyq-atqarý júıesiniń ókilderimen kezdesýler ótkizdi. Kelissózder barysynda jýrnalıs Dýman Muhametkárimniń talaptarynyń zańdylyǵy, onyń densaýlyq jaǵdaıy jáne ony turǵylyqty jerine jaqyn mekemege aýystyrýdyń mańyzdylyǵy jan-jaqty talqylandy.
Sapardyń nátıjesi men aldaǵy josparlar
Júrgizilgen jumystar men keńinen kórsetilgen qoǵamdyq qoldaýdyń arqasynda bul másele oń sheshimin taýyp jatyr. Abzal Dostıardyń habarlaýynsha, sapardyń nátıjesi óte jaqsy boldy. Taıaý ýaqytta jýrnalısi Qyzylordadaǵy mekemeden Almaty oblysyndaǵy (Zarechnyı kentindegi) jazasyn óteý mekemesine aýystyrý prosesi aıaqtalady dep kútilýde.
Qoǵam belsendisi óz jazbasynda Dýmannyń densaýlyǵy men zańdy quqyqtarynyń saqtalýyn nazarda ustap, alańdaýshylyq bildirgen, moraldyq jáne aqparattyq qoldaý kórsetken barsha oqyrmanǵa, qoǵam ókilderine rızashylyǵyn bildirdi.
