Ál-Farabı atyndaǵy Qazaq ulttyq ýnıversıtetiniń Joǵary oqý ornyna deıingi bilim berý fakúltetinde Respýblıka kúnine arnalǵan «Atamekenge qosh keldińiz!» atty merekelik kesh ótti. Joǵary oqý ornyna deıingi daıyndyq kafedrasy uıymdastyrǵan basqosý ulttyq óner men eldik qundylyqtardy ushtastyryp, bilim izdep kelgenjastardyń atamekenge degen yqylasyn ortaq arnaǵa toǵystyrdy.
Merekelik keshti fakúltet dekany Almas Áýelbekuly Bektanov quttyqtaý sózben ashty. Bilim men tárbıeni sabaqtastyrǵan shara jastarǵa ulttyq murany qurmetteýdiń, birlik pen baýyrmaldyqty qadirleýdiń mánin tanytty.
Keshke Dúnıejúzi qazaqtary qaýymdastyǵynyń Almaty qalasy fılıalynyń basshysy, aqyn, Qazaqstan Jazýshylar odaǵynyń múshesi Muratqan Shoqannyń qatysýy basqosýdyń rýhanı mazmunyn tolyqtyra tústi.
«Atamekenge qosh keldińiz!» ataýy keshtiń negizgi ıdeıasyn aıqyndady. Atameken – týǵan jermen qaýyshý ǵana emes, ana tilimen, ulttyq ónermen jáne ata dástúrmen tabysý. Osy turǵydan alǵanda, merekelik basqosý QazUÝ-dyń jastarǵa bilim berýmen qatar, olardyń ulttyq mádenıetpen baılanysyn nyǵaıtýǵa mán beretinin kórsetti.
Kesh baǵdarlamasynda án men kúı, týǵan jerge arnalǵan jyrlar jarasym tapty. Fakúltet tyńdaýshylary oryndaǵan kúıler ulttyq ónerdiń tereńdigi men kórkemdigin sezindirse, Erǵalı Edilbek, Tanat Aımereı jáne Amantaı Alı oryndaǵan «Kózińniń móldirin-aı» áni kórermenniń yqylasyna bólendi. Jastardyń sahnadaǵy óneri olardyń shyǵarmashylyq qabiletin tanytyp, merekelik keshtiń shyraıyn asha tústi.
Fılologıa fakúltetiniń jas aqyndary arnaý óleńderin oqyp, Farıza Ońǵarsynovanyń «O, týǵan jer!» jáne Kúlásh Ahmetovanyń «Týǵan jerde tolǵaný» shyǵarmalaryn usyndy. Týǵan jerge degen saǵynysh pen súıispenshilikti órnektegen jyrlar keshtiń eldik mazmunymen úndesti. Eki fakúltet jastarynyń bir sahnada bas qosýy ýnıversıtet ishindegi shyǵarmashylyq baılanystyń, ortaq rýhanı izdenistiń kórinisine aınaldy.
Qurmanǵazy atyndaǵy Qazaq ulttyq konservatorıasynyń 1-kýrs stýdenti Qabı Samǵar halyq áni «Gúldarıǵany» oryndap, kórermenge qazaqtyń dástúrli án óneriniń ásemdigin sezindirdi.
Tyńdaýshy Tanat Aımereı men kafedra oqytýshysy Nurasyl Zıadabek birge shyrqaǵan «Atameken» áni basqosýdyń áserli sátteriniń biri boldy. Ustaz ben tyńdaýshynyń sahnadaǵy jarasymy ózara syılastyqty, óner arqyly jalǵasqan urpaqtar sabaqtastyǵyn tanytty.Ánniń týǵan jerdi qasterleýge úndeıtin mazmuny merekelik keshtiń negizgi ıdeıasyn asha tústi.
Sharanyń uıymdastyrylýyna fakúltet dekany A.Á.Bektanov, Joǵary oqý ornyna deıingi daıyndyq kafedrasynyń meńgerýshisi G.T.Tıleýjanova jáne kýrator-edvaızerler ujymy uıytqy boldy. Olardyń birlesken jumysy tyńdaýshylardyń ónerin ortaǵa salyp, ýnıversıtettiń mádenı ómirine belsendi aralasýyna múmkindik berdi.
«Atamekenge qosh keldińiz!» keshi QazUÝ-dyń bilim men ulttyq tárbıeni sabaqtastyratyn rýhanı orta retindegi kelbetin aıqyndaıdy. Án men kúıdi, jyr men taǵylymdy júzdesýdi toǵystyrǵan mereke Respýblıka kúniniń eldikmánin ashyp, jastardy atamekenge qurmet pen ortaq qundylyqtar aıasynda biriktirdi.
Ál-Farabı atyndaǵy Qazaq ulttyq ýnıversıteti
Joǵary oqý ornyna deıingi bilim berý fakúltetiniń
aǵa oqytýshylary Amırkanov M.B., Májıqyzy N., Nýsýpbaeva S.A.
