Almaty oblysynda Dúnıejúzilik tazalyq kúnine oraı jalpyhalyqtyq senbilik ótti. Sharaǵa oblys turǵyndary, eriktiler men jastar qatysty.
Olar tańmen talasa turyp saıabaqtar men aýlalardy qoqystan tazartty. Sondaı-aq Qonaev qalasynda 200 túp alma aǵashynyń kósheti otyrǵyzyldy. Igi iske atsalysqan oblys ákimi Shyńǵys Árinov, qorshaǵan ortany taza ustaý – barshaǵa ortaq mindet ekenin atap ótti. Sondaı-aq óńir turǵyndaryn «Taza Qazaqstan» bastamasyna belsendi qatysyp, eldimekenderdiń tazalyǵy men kórkeıýine úles qosýǵa shaqyrdy.
Almaty oblysynda respýblıkalyq «Taza Qazaqstan» ekologıalyq sharasy júıeli túrde ótkiziledi. Búginniń ózinde oblys kóleminde ótken senbilikke 40 myńnan astam adam qatysyp, 2230 tonna qaldyq shyǵaryldy. 762 gektar aýmaq tazartylyp, bul jumysqa jumysqa 400-den asa tehnıka jumyldyrylǵan.
« Bizde tazalyq jumystary 31 apta boıy jalǵasyp keledi. Kúni búginge deıin tazalyq jumystaryna 730 myńǵa jýyq adam qatysyp, 10 myń gektar aýmaq tazalandy. Sonymen qosa 104 081 túp aǵash otyrǵyzyldy . İs-sharalarǵa 4200-den astam tehnıka paıdalanyldy» – deıdi Almaty oblystyq turǵyn úı-kommýnaldyq sharýashylyq jáne abattandyrý basqarmasynyń ókili Alına Túsipbaeva.
Senbilikke qatysýshylar árbir eldimekenniń tazalyǵy turǵyndarǵa tikeleı baılanysty ekenin aıtty.
«Osyndaı ónegeli istiń ótetinin estigen boıda qýana-qýana keldik.Qazir qalamyz tez kórkeıip keledi. Endi otyrǵyzǵan aǵashtar jaıqalyp, osy mań balalardyń shat kúlkisine toly, nemerelerimiz erkin oınap júretin orynǵa aınalsa eken deımiz. Búgingi shara bizdiń birligimizdi anyq kórsetti», – dedi oblystyq sheshen-ıngýsh etnomádenı birlestiniń múshesi Shahıt Labazanov.
2026–2030 jyldarǵa arnalǵan josparǵa sáıkes, Almaty oblysynda jyl saıyn shamamen 220 myń túp aǵash otyrǵyzý kózdelgen.
