Formýla-1 salasynda 23 jyldan astam tájirıbesi bar ıspanıalyq maman Chavı Pýjolar Almaty oblysyndaǵy «Sokol» sporttyq-tehnıkalyq keshenine keldi. Ol avtodromnyń ınfraqurylymymen tanysyp, joǵary deńgeıdegi halyqaralyq jarystardy, sonyń ishinde Formýla-1 kezeńderin ótkizý múmkindikterin baǵalady jáne keshendi odan ári damytý boıynsha óz usynystaryn bildirdi.
Chavı Pýjolar Formýla-1 chempıonatyndaǵy Jaguar, Williams, Toro Rosso jáne Sauber sekildi tanymal komandalarda kóp jyl eńbek etken tájirıbeli maman. Ol Sauber komandasynda jarys dırektory qyzmetin atqarǵan. Búginde onyń kásibı tájirıbesi halyqaralyq avtosportty damytýǵa baǵyttalǵan jobalarda keńinen qoldanylyp keledi.
«Sokolǵa» sapary barysynda sarapshy jarys trassasynyń konfıgýrasıasyn, tehnıkalyq ınfraqurylymyn jáne qaýipsizdikti qamtamasyz etý júıesin jan-jaqty zerdeledi. Ásirese avtodromnyń Halyqaralyq avtomobıl federasıasynyń (FIA) qazirgi talaptaryna sáıkestigine erekshe nazar aýdardy.
Tekserý qorytyndysy boıynsha Chavı Pýjolar keshenniń ınfraqurylymyna oń baǵa berdi. Onyń pikirinshe, avtodrom jalpy alǵanda zamanaýı qaýipsizdik standarttaryna sáıkes keledi, al jetildirýdi qajet etetin tustar jekelegen máselelermen ǵana shekteledi.
Sarapshynyń usynystary negizinen FIA-nyń sońǵy talaptary men halyqaralyq tájirıbesin eskere otyryp, qaýipsizdik júıesiniń keıbir elementterin jetildirýge qatysty boldy. Bul rette avtodromnyń jalpy tujyrymdamasy men ınfraqurylymyna qatysty eleýli eskertýler aıtylǵan joq.
Chavı Pýjolar keshenniń zamanaýı erekshelikterine de toqtaldy. «Sokol» álemdegi salystyrmaly túrde jańadan salynǵan halyqaralyq avtodromdardyń biri bolǵandyqtan, munda jarystardy uıymdastyrýdyń ozyq tehnologıalyq sheshimderi men zamanaýı tásilderin qoldanýǵa múmkindik bar.
Keshenniń uzyndyǵy 4 495 metr bolatyn negizgi jarys trassasyn Formýla-1 avtodromdaryn jobalaýǵa mamandanǵan álemge áıgili Tilke Engineers & Architects sáýlet búrosy ázirlegen. Qazirgi ýaqytta avtodrom FIA Grade 2 halyqaralyq sanatyna ıe. Al keshendi odan ári damytý jospary ınfraqurylymdy budan da joǵary deńgeıge deıin jańǵyrtý múmkindigin qarastyrady.
Chavı Pýjolardyń sapary Qazaqstanda iri halyqaralyq avtosport jarystaryn ótkizý perspektıvalaryn zerdeleý baǵytyndaǵy saraptamalyq jumystyń kezekti kezeńi boldy. Formýla-1 salasynda mol tájirıbe jınaqtaǵan mamandardy tartý «Sokol» sporttyq-tehnıkalyq keshenine táýelsiz kásibı baǵa alýǵa jáne aldaǵy damý baǵyttaryn aıqyndaýǵa múmkindik beredi.
Sapar sońynda Chavı Pýjolar keshen ujymyna aldaǵy jumystaryna tabys tilep, Qazaqstanda avtomobıl jáne motosıkl sportyn damytýǵa baǵyttalǵan bastamalarǵa qoldaý bildirdi.
