Avtor: Murat ÓTEBAIULY

Teńdessiz jalǵan sóz, ekijúzdilik pen jaǵympazdyqtyń qoǵamymyzben bite qaınasqanyna kóp boldy.

Bılik tarapynan eshqandaı qarsylyq kórmegendikten, ol órship, jaǵympazdyq tamyryn tereńge jaıyp, qoǵamnyń dertine aınaldy.

Bılik dese bárin umytyp, baılyq, mansap, ataq dese esten aıyrylyp, jeme-jemge kelgende ulttyń múddesin satyp, «Máz bolady bolysyń» degenniń kebin kıip júrmiz.

Búginde jaǵympazdyqtyń júıesi áli joıylǵan joq.

Kezinde Tuńǵysh Prezıdentti jer-kókke syıǵyzbaı maqtaǵandar endi keshegi júıeniń kemshilikterin tizip, synaýǵa kóshti. Olar qazirgi júıege beıimdelýge jáne burynǵy prezıdentten boıyn aýlaq salýǵa tyrysýda. Mundaı jaǵympazdar bizde tek depýtattar arasynda ǵana emes, sheneýnikterdiń, zıaly qaýym ókilderiniń, blogerler men jýrnalıserdiń arasynda da bar.

Jaramsaqtar men jaǵympazdar úshin olardyń tiregi de, súıenishi de – bılikke degen «senim» ǵana.

Olardyń senimi bılik aýysqan saıyn ózgeredi. Jańa bılik kelisimen-aq ustanymdaryn lezde ózgertip, esh oılanbastan taǵy bir «jańa senimge» ıe bolady.

Ondaı deńgeıge túsken adamdardan elge jaqsylyq kútý beker-aý.

Mundaı pıǵyldaǵy adamdar halyqqa eshqandaı áleýmettik ózgeris te, jaqsylyq ta ákelmeıdi.

Olarǵa ádilet pen shyndyq aıaqasty bolyp jatsa da – báribir. Áıteýir joǵaryda otyrǵan yqpaldy adamdardyń kóńilinen shyǵyp, óz mansabynyń jolyn túzese bolǵany. Olardyń ómirlik saıası maqsatynyń eń úlkeni de, negizgisi de – joǵaryǵa unaý, joǵaryǵa jaǵyný.

Jaǵympazdyq jaılaǵan jerde otansúıgishtiktiń orny oısyrap turady.

Mundaı pıǵyldaǵy adamdarda adaldyq, ultjandylyq, otanshyldyq, adamgershilik qasıetter qaıdan bolsyn?!

Olar jyldar boıy qarapaıym halyqtyń muń-muqtajyna, túıtkildi máselelerine soqyr da, sańyraý da boldy.

El turmysynyń nasharlaýyna, otyz jyl boıy halyqtyń rýhyn janshyp, rýhanı jańǵyrýyna kedergi keltirgenderdiń qatarynda bılik basyndaǵylardy dáriptegender de bar.

Kezinde N. Nazarbaevty aspandata jarysa maqtap, halyqtyń qyzmetshisi emes, qubylysqa aınaldyryp jiberdik.

Pirge teńep, jarty qudaıǵa aınaldyrdyq. Sóıtip, óz qadirimizdi ketirdik. Qunymyzdy túsirdik.

Tipti «Patsha – Qudaıdyń jerdegi kóleńkesi», «Patshaǵa qarsy shyqqan – Qudaıǵa qarsy shyqqan» degen sózderdi din ókilderi aıtqannan keıin esh nársege tańǵalmaıtyn boldyq.

Kórdińiz be, qoldan «qudaı jasaý» tehnologıasynyń op-ońaı ekenin.

Shyn máninde, munyń shyn Qudaıǵa eshqandaı qatysy joq. Ol – múlde bólek másele.

Osydan-aq bizge quldyq sananyń qaıdan kelgenin túsiný qıyn emes.

Ol – ózin jarty qudaı sanaǵan ádiletsiz patshalardyń adamdardyń boıyna ekken úreıi men qorqynyshy ǵana.

«Patsha – Qudaıdyń jerdegi kóleńkesi» degen sóz eshbir hadıste aıtylmaǵan.

Demek, bul – jalǵan.

Eshbir din muny qoldamaıdy.

Barlyq paıǵambarlar óz qaýymyn eń áýeli Allaǵa senýge jáne Oǵan eshnárseni serik qospaýǵa shaqyrǵan.

Kópirme sóz ben kóregendiktiń, shyn zıaly men zıandynyń arajigin ajyrata almaıtyn zamanǵa tap boldyq degen – osy.

Jaǵympazdyq adaldyqpen syıyspaıdy. Kúni úshin júrgender patrıot bola almaıdy.

Bir másele anyq: shyndyqty aıta almaǵan adam óz eliniń patrıoty emes.

Naǵyz patrıot – óz elin orynsyz maqtaıtyn adam emes, qaıta onyń kemshilikterin kórip, unamsyz tustaryn túzetýge yqpal etetin adam.

Búgingi aqıqat sol – jaǵynsaq, eń aldymen týǵan halqymyzǵa jaǵynýymyz kerek.

Sebebi osy halyqtyń arqasynda – patshamyz, osy halyqtyń arqasynda – ákimbiz, osy halyqtyń arqasynda depýtatpyz, aqynbyz, jazýshymyz.

Bılik te, baılyq ta – kóshpeli, ýaqytsha.

Al halyq – máńgi.

Sondyqtan halyq aldyndaǵy paryz bir adamnyń aldyndaǵy qaryzdan áldeqaıda jaýapty.

Bılik degen – halyq senimine ıe bolý, halyqqa súıenip el basqarý.

Ol – quldyq psıhologıaǵa, jaǵympazdyq pen jaramsaqtyqqa qashanda qarama-qaıshy uǵym.

Prezıdent Q. Toqaev: «Jaǵympazdyqqa qatysty aıtar bolsaq, men oǵan qarsymyn. Bireýmen jaqsy qarym-qatynastan góri men úshin eldiń múddesi joǵary», – degen edi.

Eger Prezıdent ózi aıtqandaı, maqtaı bergendi jany qalamaıtyn bolsa, bul máselege túbegeıli toqtaý qoıýy tıis.

Búgingi aqıqat – osy.

Q. Toqaev óz mańaıyndaǵy jaǵympazdarǵa emes, halyqqa arqa súıeýi kerek.

Sonda bári ózgeredi.