Búgin Aqordada Memleket basshysy Qasym-Jomart Toqaev bir top óner maıtalmandaryna memlekettik ataq pen joǵary nagradalardy saltanatty túrde tabystaǵan bolatyn. Marapattalǵandardyń qatarynda Qazaqstannyń Halyq ártisi Maqpal Júnisova da bar. Ol ekinshi dárejeli «Barys» ordenimen ıelendi. Alaıda, belgili bolǵandaı, estrada juldyzy Aqordaǵa qur qol kelmegen bolyp shyqty, dep habarlaıdy Qamshy.kz aqparat agenttigi.

«Aqorda» baǵdarlamasynyń júrgizýshisi, jýrnalıs Aqdarıǵa Muhaddas saltanatty sharanyń eń áserli sátin vıdeoǵa túsirip alǵan.

https://www.instagram.com/reel/DYmWj4ZM-ou/?igsh=ZDJzZjB0NHR4cGg1

Beınejazbadan baıqaǵanymyzdaı, resmı bólim aıaqtalǵan soń Maqpal Júnisova prezıdent Qasym-Jomart Toqaevqa jaqyndap, qolyndaǵy syılyǵyn usynǵan.

«Aǵa, mynany Sizge bere salsam bola ma?» – dedi ánshi aǵynan jarylyp.
Prezıdent óz kezeginde jyly shyraı tanytyp: «Árıne, árıne, bolady!» – dep jaýap berdi. Memleket basshysy syılyqty yqylaspen qabyl alyp, óner ıesine shyǵarmashylyǵy úshin alǵys aıtty.

Jýrnalısiń málimetinshe, Halyq ártisi prezıdentke óziniń ánderi jazylǵan úntaspasyn (dıskisin) tartý etken.

«Apaıdyń aıtýynsha, bul – onyń Aqordaǵa alǵash kelýi. Ári araǵa shırek ǵasyr salyp, memleket tarapynan alǵan alǵashqy marapaty eken. Sondyqtan, kóńilde tolqynys baryn jasyrmady. Ánderi jazylǵan úntaspasyn da ala kelipti. Saltanatty rásim aıaqtalǵan soń Prezıdentke arnaıy usynyp, ótken kúnderdiń esteligindeı yqylasyn bildirdi», – dep jazdy jýrnalıs Aqdarıǵa Muhaddas.

Jeli qoldanýshylary bul vıdeony óte jyly qabyldap, Maqpal Júnisova men Prezıdenttiń qarapaıymdylyǵyna rızashylyqtaryn bildirip jatyr.