«Zań men tártip» qaǵıdaty aıasynda óńirde dástúrli túrde uıymdastyrylatyn «Abaı sózi – ádildik temirqazyǵy» atty respýblıkalyq zıatkerlik oıyn ótti. Bıyl bul joba úshinshi ret uıymdastyrylyp otyr. Aýqymdy sharaǵa elimizdiń 5 oblysynan kelgen 11 komanda qatysty. Atap aıtqanda, Aqtóbe, Mańǵystaý, Qaraǵandy, Shyǵys Qazaqstan, Almaty jáne Abaı oblystarynyń stýdent jastary bas qosty.
Joba Abaı murasy arqyly jastar arasynda ádildik, adaldyq, parasattylyq sekildi qundylyqtardy dáripteýge baǵyttalǵan. Sonymen qatar, shara aıasynda jastardyń quqyqtyq sanasyn qalyptastyryp, sybaılas jemqorlyqqa qarsy mádenıetti nyǵaıtýǵa basymdyq berildi.
Zıatkerlik oıyn ádebı Quest jáne Quiz formatynda uıymdastyryldy. Ádebı Quest barysynda qatysýshylar Semeı qalasy men «Abaı – Shákárim» memorıaldyq kesheni aralyǵyndaǵy tarıhı-mádenı oryndardy aralap, Abaı Qunanbaıulynyń ómiri men shyǵarmashylyǵyna qatysty tapsyrmalardy oryndady.
Mańǵystaý energetıkalyq kolejiniń stýdenti Nurbolat Boqaevtyń aıtýynsha, mundaı jobalar jastardyń ádildikke degen kózqarasyn qalyptastyrýda mańyzdy ról atqarady.
— Mańǵaz Mańǵystaýdan Abaı oblysyna arnaıy keldik. Biz bul sharaǵa qatysýshy ári qonaq retinde keldik. Dál qazir Muhtar Áýezov mýzeıin aralap, erekshe áser alyp jatyrmyz. Kóptegen suraqtarymyzǵa jaýap taýyp, jańa málimettermen tanystyq. «Zań men tártip» ıdeologıasynyń jastarǵa bereri mol dep oılaımyn. Sebebi bolashaqta jastar ádil, adal ári jaýapkershiligi joǵary azamat bolýy kerek. Osyndaı jobalar jas býyndy ádildikke tárbıeleıdi. Búgingi jarystyń ózi joǵary deńgeıde ári ádil uıymdastyrylǵan, — deıdi qatysýshy.
Al Almaty oblysynan kelgen Esik gýmanıtarlyq-pedagogıkalyq kolejiniń stýdenti Lýıza Uzaq bul sapardyń ózine erekshe áser syılaǵanyn aıtady.
— Biz Esik qalasynan «Zań men tártip» ıdeologıasy aıasynda uıymdastyrylǵan respýblıkalyq zıatkerlik jarysqa qatysý úshin arnaıy keldik. Semeı óńirine alǵash ret kelýim. Bul men úshin úlken múmkindik boldy. Osy ýaqytqa deıin Abaıdy tek kitaptar men túrli aqparattar arqyly tanyp kelsek, búgin onyń tulǵasyn múlde jańa qyrynan tanydym. Abaı júrgen jerlerdi kórip, ómir súrgen ortasymen jaqynyraq tanysý erekshe áser syılady. Oıyn óte qyzyqty ári joǵary deńgeıde uıymdastyrylǵan. Ásirese, kvesttiń mýzeıler arasynda ótkeni qatty unady. Mundaı format qatysýshylardyń toppen jumys isteý qabiletin damytyp, birlesip sheshim qabyldaýǵa úıretedi, — deıdi ol.
Sharanyń ekinshi jartysynda qatysýshylar «Qazaqsha Quiz» ıntellektýaldyq oıynynda baq synady. Quiz suraqtary Uly Abaıdyń ómiri, Abaı óńiriniń kıeli oryndary jáne sybaılas jemqorlyqtyń aldyn alý baǵytyndaǵy halyqaralyq tájirıbelerdi qamtydy.
Jarys barysynda komandalar joǵary daıyndyq deńgeıin kórsetip, logıkalyq oılaý men jyldam sheshim qabyldaý qabiletterin synaqtan ótkizdi.
Marapattaý rásiminde sóz alǵan Abaı oblysy ishki saıasat basqarmasynyń basshysy Jarqyn Jumadilov qatysýshylardy quttyqtap, jobanyń mańyzdylyǵyna toqtaldy.
— Sybaılas jemqorlyqqa qarsy mádenıet eń aldymen zańnan emes, sana men tárbıeden bastalady. Bul uly ustanymdy Hakim Abaı óz shyǵarmalarynda tereń tolǵap, keıingi urpaqqa amanat etti. Abaıdyń «Adal júrip, adal tur» degen taǵylymdy sózi – tutas bir ómirlik qaǵıda, ádiletti qoǵamnyń temirqazyǵy. Memleket basshysy Qasym-Jomart Kemeluly Toqaev «Ádiletti Qazaqstan» qurý jolynda zań ústemdigi men adaldyq qaǵıdatyna erekshe mán berip keledi. Bul baǵyttaǵy jumystardyń nátıjeli bolýy – eń aldymen jas urpaqtyń sanasyna baılanysty. Búgingi dodada qatysýshylar ózderiniń bilimin ǵana emes, bıik mádenıetin, tereń tanymyn jáne ult qundylyqtaryna degen qurmetin kórsetti, — dep atap ótti basqarma basshysy.
Respýblıkalyq zıatkerlik oıyn qorytyndysynda barlyq kezeń boıynsha jınaǵan upaılar eseptelip, júldeli oryn ıegerleri anyqtaldy. Atap aıtqanda, Abaı oblysynyń Jastar máslıhaty komandasy I oryndy ıelense, II oryn Shyǵys Qazaqstan oblysynan kelgen Sársen Amanjolov ýnıversıtetiniń stýdentterine buıyrdy. Al III oryndy Semeı medısına ýnıversıteti komandasy qanjyǵasyna baılady.
