«Qazaqmys» Toby úshin mıneraldyq-shıkizat qoryn damytý basty strategıalyq basymdyqtardyń biri bolyp qala beredi. Búginde geologıalyq barlaý jumysynyń basym bóligi Qazaqstannyń mys ónerkásibiniń tarıhı ortalyǵy jáne kompanıanyń qyzmet etetin negizgi óńiri — Ulytaý oblysynda shoǵyrlanǵan.
2026 jyly «Qazaqmys» Jezqazǵan óńirindegi geologıalyq barlaý jumysyn qarjylandyrýdy aıtarlyqtaı ulǵaıtty. Buǵan deıin bul maqsatqa jyl saıyn shamamen 5 mln AQSH dollary baǵyttalsa, búginde ınvestısıa kólemi jylyna 40 mln dollarǵa deıin jetti. Qarajat Jezqazǵan ken alabynyń tereń qabatyn zertteýge, jańa perspektıvaly ýchaskelerdi izdeýge jáne óńirdiń mıneraldyq-shıkizat qoryn keńeıtýge baǵyttalýda.
Sonymen qatar kompanıa burǵylaý jumysynyń kólemin aıtarlyqtaı arttyrýda. Eger aldyńǵy jyldary paıdalaný maqsatyndaǵy burǵylaýdyń kólemi jylyna shamamen 63 myń qýma metrdi qurasa, 2026 jyly tek Jezqazǵan baǵyty boıynsha 62,4 myń qýma metr geologıalyq barlaý úshin burǵylaý júrgizý josparlanǵan. Bul rette aıta keterligi, Jezqazǵan kompanıanyń geologıalyq barlaý baǵdarlamasyndaǵy úsh óńirlik baǵyttyń biri bolyp sanalady. Osyǵan oraı geologıalyq barlaý jumysynyń jalpy aýqymy shamamen eki esege ulǵaıdy.
Baǵdarlamany iske asyrý úshin Ulytaý oblysynda qazirdiń ózinde alty zamanaýı jerústi burǵylaý qondyrǵysy iske qosyldy. Buǵan qosa jalpy quny 1,3 mlrd teńgeni quraıtyn úsh jerasty burǵylaý agregaty men qosalqy tehnıkany satyp alý jumysy júrgizilýde. Jerústi burǵylaý jumysyna arnalǵan eki burǵylaý qondyrǵysy kúrdeli jóndeýden ótti. Sondaı-aq burǵylaý brıgadalarynyń jumysyna qolaıly jaǵdaı jasaý jáne ınfraqurylymdy jańartý jumysy jalǵasýda.
2025 jyly júrgizilgen geofızıkalyq zertteýdiń qorytyndysy boıynsha úsh perspektıvaly ýchaskede burǵylaý jumysy bastaldy. Ońtústik Itaýyz, Sorkudyq–Jartas ýchaskelerinde jáne Jylandy ken oryndary tobynda qosymsha jumys atqarý josparlanǵan. Tereń qabattarda júrgizilip jatqan zertteýler Jezqazǵan ken
ornynyń geologıalyq qurylymy týraly jańa derek alýǵa, sondaı-aq tereńde jatqan ken deneleriniń áleýetin baǵalaýǵa múmkindik beredi.
Ken oryndarynyń tereń qabaty men qaptaldaryn zertteý jobalaryna salynǵan jalpy ınvestısıa kólemi tehnıka satyp alýdy qospaǵanda 2,27 mlrd teńgeni quraıdy. Mamyr aıynan bastap qosymsha burǵylaý kúshi jumyldyrylyp, shilde aıyna qaraı óndiristik alańdarda onǵa jýyq burǵylaý qondyrǵysyn paıdalaný josparlanýda.
Júrgizilgen júıeli geologıalyq barlaý jumysynyń nátıjesinde kólemi 63,5 mln tonna kendi quraıtyn rezervtik ken oryndarynyń portfeli qalyptastyryldy. Onyń quramynda 620,3 myń tonna mys jáne 12,9 tonna altyn bar. Bul qordyń eleýli bóligi memlekettik balansqa engizildi.
Sonymen qatar kompanıa zamanaýı sıfrlyq tehnologıalardy belsendi túrde qoldanýda. Geologıalyq bólimshelerde ken oryndarynyń úshólshemdi modelin qurýǵa jáne geologıalyq derekti ınterpretasıalaý dáldigin arttyrýǵa múmkindik beretin Micromine júıesi engizilýde. Baǵdarlama boıynsha 177 maman oqytýdan ótti, bolashaqta júıeni paıdalanýshylar sanyn 401 qyzmetkerge deıin arttyrý josparlanýda.
Kompanıada atap ótilgendeı, Ulytaý oblysyndaǵy geologıalyq barlaý jumysyn keńeıtý óńirdiń bolashaǵyna salynǵan ınvestısıa bolyp tabylady. Jańa qorlar qoldanystaǵy óndiristik qýatty turaqty júktememen qamtamasyz etip, jumyskerlerdiń uzaq merzimdi jumyspen qamtylýyna ári Jezqazǵan óńirindegi taý-ken metalýrgıa kesheniniń odan ári damýyna jol ashady.
