Qazaqstanda alǵash ret Astana AI Film Festival ótip, birden álemdik aýqymdaǵy sharaǵa aınaldy. 125 elden túsken 8 067 ótinim ony jasandy ıntellekt kómegimen jasalǵan kıno týyndylary arasyndaǵy eń iri halyqaralyq baıqaýǵa aınaldyrdy.
Búgin elordada jeńimpazdar jarıalandy.
Gran-prı men $450 myńdy Latvıadan kelgen Nikolay Shestak «The First Honest Day» fılmi úshin ıelendi. İs-áreketterińiz syrtqy kelbetińizdi tikeleı ózgertetin álemdi elestetip kórińiz: jamandyq jasasańyz – ajarsyzdanasyz, jaqsylyq jasasańyz – qulpyra túsesiz. Jeńimpaz mundaı marapatty kútpegenin, al júlde qarjysyn jańa fılmder túsirýge jumsamaq ekenin aıtty.
Qazaqstandyq Myrzahan Jumahan «Úzdik keıipker» nomınasıasynda jeńiske jetti. Onyń «It Was Just a Joke» komedıasynda ıt pen onyń ıesiniń aǵasy bir ázildiń kesirinen janjaldasyp qalady. Oqıǵanyń ary qaraıǵy órbýi naǵyz blokbasterden kem emes. Avtordyń ózi prank pen kóńildi jaqsy kóretinin, sondyqtan osyndaı oqıǵany túsirgenin aıtady.
Ekinshi oryn jáne $200 myń – Úndistannyń «SITARA» fılmine buıyrdy. Úshinshi oryn men $100 myńdy ıspanıalyq «Looking For Perseida» ıelendi.
Myńdaǵan ótinimniń ishinen fınalǵa nebári 25 jumys ótti. Olardy halyqaralyq qazylar alqasy baǵalady. Onyń quramynda IýNESKO-nyń burynǵy basshysy Odrı Azýle jáne ınvestor Baladjı Srınıvasan boldy.
Festıváldiń jalpy júlde qory – $2 mln: onyń jartysy júldelerge, qalǵan jartysy perspektıvaly AI-komandalardy qoldaýǵa jáne Qazaqstandaǵy óndiristi damytýǵa baǵyttalady.
JI kómegimen jasalǵan fılmder búginde úlken ekranda kórsetilip, júzdegen myń dollar kólemindegi júldelerge ıe bolyp jatyr. Astana mundaı festıváldi alǵash ret qabyldap, álemniń túkpir-túkpirinen kelgen úzdik jumystar tańdalatyn alańǵa aınaldy.
