Astanada M. Áýezov atyndaǵy Ortalyq qalalyq kitaphanasynda Jeńis kúni men Otan qorǵaýshylar kúnine oraı «Máńgi óshpes uly erlik» taqyrybynda patrıottyq kezdesý ótti, dep habarlaıdy elorda ákimdiginiń resmı saıty.

İs-sharany Astana qalasy Ortalyqtandyrylǵan kitaphanalar júıesine qarasty kitaphana ujymy uıymdastyrdy. Kezdesýge general-leıtenant, tarıh ǵylymdarynyń doktory, profesor, Qazaqstan Respýblıkasy Ulttyq jaratylystaný ǵylymdary akademıasynyń akademıgi Abaı Tasbolatov qatysyp, jastarmen mazmundy suhbat qurdy.

Jıynǵa Ulttyq ulannyń 6636 áskerı bóliminiń sarbazdary men «Turan» kolejiniń stýdentteri qatysyp, belsendilik tanytty.

Kezdesýdiń negizgi maqsaty – jastar arasynda otansúıgishtik qundylyqtardy dáripteý, Jeńis kúni men Otan qorǵaýshylar kúniniń tarıhı mańyzyn nasıhattaý, jas urpaqtyń el tarıhyna qyzyǵýshylyǵyn arttyrý jáne erlik pen azamattyq jaýapkershiliktiń mánin túsindirý boldy.

İs-shara barysynda «Máńgi óshpes uly erlik» taqyrybyndaǵy kitap kórmesi tanystyrylyp, merekelik beınebaıan kórsetildi. Sonymen qatar kesh qonaǵymen suhbat uıymdastyrylyp, qatysýshylar ózderin tolǵandyrǵan suraqtaryn qoıdy.

Kezdesý barysynda Abaı Tasbolatov táýelsizdiktiń alǵashqy jyldaryndaǵy Qarýly kúshterdiń qalyptasý kezeńi týraly estelikterimen bólisti. Ol áskerı kadr tapshylyǵy, sol kezeńdegi áleýmettik-ekonomıkalyq qıyndyqtar jáne áskerı bilim berý júıesin qalyptastyrý jolyndaǵy eńbekter týraly aıtyp ótti.

«Patrıottyq tárbıe – ózdiginen qalyptaspaıdy. «Men Otandy súıemin» dep aıtý ǵana jetkiliksiz. Onyń naqty isi, jaýapkershiligi bolýy kerek. Sonyń bir mańyzdy baǵyty – tarıhty bilý. Ótkendi de, búgindi de tereń túsiný qajet. Biz kópultty memleketpiz, bizdiń kúshimiz – birligimizde», – dedi spıker.

Sonymen qatar ol jastardy el tarıhyn qurmetteýge, bilim alýǵa, tártipti bolýǵa jáne Otanǵa adal qyzmet etýge shaqyrdy.