Astanada Otan qorǵaýshylar kúnine oraı Óner mýzeıi bazasynda Saǵadat Nurmaǵambetov atyndaǵy áskerı kolej kýrsanttaryna tanymdyq kezdesý uıymdastyryldy. İs-shara barysynda olarǵa sırek kezdesetin ulttyq mýzykalyq aspaptar týraly málimet aıtyldy, dep habarlaıdy Astana ákimdiginiń resmı saıty.

Kýrsanttarǵa qaıta qalpyna keltirilgen jáne sırek mýzykalyq aspaptardyń túpnusqasy qoıylǵan kórme kórsetildi. Onyń ishinde áskerı joryqtarda qoldanylǵan «joryqtyq» aspaptar da bar.

Qonaqtarǵa olardyń áýeni tyńdatylyp, mýzykanyń áskerı áreketter men salt-joralǵylarda qalaı paıdalanylǵany túsindirildi.

Kórmeniń negizgi eksponattarynyń biri – kerneı. Bul ejelgi úrmeli aspap túrki halyqtary arasynda keń taralǵan.

Ejelde kerneı tek mýzykalyq qural ǵana emes, sonymen qatar belgi berý qyzmetin atqarǵan: onyń kómegimen áskerı buıryqtar jetkizilip, sarbazdar jınalǵan, sondaı-aq handar men qolbasshylardy qarsy alý, báıgeler men sherýler sıaqty saltanatty rásimder súıemeldengen.

İs-shara aıasynda kóne aspaptarda mýzykalyq shyǵarmalar oryndalyp, kýrsanttarǵa olardyń shyǵý tegi, qoldanylý erekshelikteri men mádenı róli týraly aıtyldy.

Uıymdastyrýshylar mundaı kezdesýler bolashaq áskerı qyzmetshilerdiń patrıottyq rýhyn nyǵaıtýǵa jáne tarıhı-mádenı tanymyn keńeıtýge baǵyttalǵanyn atap ótti.

Sonymen qatar, mundaı is-sharalar áskerı dástúr men mádenı muranyń baılanysyn kórsetip, jastardyń el tarıhy men ulttyq qundylyqtarǵa degen qurmetin qalyptastyrady.