Almaty oblysynda 2025 jyldan beri 3181 páter satyp alynyp, osy ýaqytqa deıin onyń 2536-sy áleýmettik osal top sanatyna jatatyn azamattarǵa úlestirildi. Odan bólek jyl sońyna deıin taǵy 645 páter kilti tabystalady. Atalǵan baspanalardyń barlyǵy kópbalaly analarǵa, qamqorshysynan nemese ata-anasynan aıyrylǵan jandarǵa jáne erekshe qajettiligi bar azamattarǵa beriledi, – dep habarlaıdy Almaty oblysy ákiminiń baspasóz qyzmeti.
Búgin óńirde 54 otbasy baspana baqytyna keneldi. Kilt tabystaý rásiminiń biri Talǵar aýdanynyń Tuzdybastaý aýylynda ótti. Bul sharaǵa Almaty oblysynyń ákimi Marat Sultanǵazıev arnaıy baryp, turǵyndar qýanyshyna ortaqtasty. Sondaı-aq 21 otbasyǵa sýjańa páter kiltin tartý etti.
Óńir basshysy óz sózinde azamattardy baspanamen qamtamasyz etý memlekettik saıasattyń basty baǵyttarynyń biri ekenin atap ótti. Marat Eleýsizulynyń sózinshe, búginde óńirde páter kezeginde turǵan 74 839 azamat bar. Onyń ishinde Talǵar aýdany boıynsha 10 myńǵa jýyq adam tirkelgen. Sońǵy eki jylda Talǵar aýdanynda 459 páter satyp alynǵan. Onyń 252-si óz ıelerine berildi. Al búgin 21 otbasy baspanaly boldy.
«Memleket basshysy Qasym-Jomart Toqaev halyqtyń ál-aýqatyn arttyrý, azamattarǵa jaıly ómir súrýge jaǵdaı jasaý memlekettiń basty mindetteriniń biri ekenin únemi aıtyp keledi. Onyń ishinde baspana máselesi de mańyzdy oryn alady.
Turǵyn úı kezeginde turǵan azamattardyń máselesi árdaıym nazarymyzda. Aldaǵy kezeńde de bul baǵyttaǵy jumysty júıeli túrde jalǵastyryp, turǵyn úı qoryn ulǵaıtýǵa basymdyq beremiz. «Úıi bardyń – kúıi bar» deıdi dana halqymyz. Ár otbasynyń óz shańyraǵy, óz úıi bolǵany – eldiń ál-aýqatynyń jaqsarǵanynyń bir kórsetkishi ekeni anyq», – dedi aımaq basshysy.
Baspanaly bolǵan turǵyndardyń biri – 6 balanyń anasy Gúlmıra Qudaıbergenova. «2012 jyldan beri úı kezeginde turyp, búgin úsh bólmeli páterge qol jetkizdim. Alty perzentim bar. Bir balam erekshe bolyp dúnıege keldi. Jańa páterimiz kóńilimizden shyqty. İshi keń, jaryq ári jaıly. Baspanaly bolatynymdy alǵash estigende sener-senbesimdi bilmedim. Qatty tolqydym. Balalarymnyń da qýanyshynda shek joq. Osyndaı múmkindik syılaǵan jandarǵa alǵys aıtamyn», – dedi turǵyn.
Aıta keteıik, búgin oblystyń ózge aýdandaryndaǵy turǵyndar da qonys toıyn toılady. Máselen, Qarasaı aýdanynda 20, İle aýdanynda 13 azamat páter ıesi atandy. Bul baǵyttaǵy jumystar aldaǵy ýaqytta da jalǵasyn tabady.
