Prezıdent Qasym-Jomart Toqaev Qazaqstandaǵy jańadan engizilgen vıse-prezıdent qyzmetine kim taǵaıyndalatynyn aldaǵy bir apta nemese on kún ishinde jarıalaıtynyn aıtty.

«Vıse-prezıdent qyzmetin kim atqaratyny kelesi apta nemese on kún ishinde belgili bolady. Qazir onyń esimin ataý áli erte. Meniń oıymsha, bul – bárińiz jaqsy biletin tanymal adam», – dedi Memleket basshysy.

Toqaevtyń aıtýynsha, qazirgi kúrdeli kezeńde vıse-prezıdent qyzmeti el úshin asa qajet. Bul laýazym Konstıtýsıada ádeıi qarastyrylǵan.

Prezıdent sondaı-aq jańa memlekettik organ – Qazaqstan Halyq Keńesiniń jumysyn iske qosý josparlanyp otyrǵanyn málimdedi. Onyń sózinshe, bul organ Qazaqstan halqy Assambleıasy atqarǵan jumysty kúsheıtip, odan ári damytpaq.

Memleket basshysy Qazaqstandy «úlken qurylys alańyna» aınaldyrý qajettigin de aıtty. Óńirlerde emhanalar, balalardy ońaltý ortalyqtary jáne basqa da áleýmettik nysandar salynbaq. Al Astanada jańa kópir, Dombyra saraıy jáne Sý resýrstaryn zertteý ortalyǵy boı kóteredi.