Almaty oblysynyń Kegen aýdany Qarqara jaılaýynda dúıim jurt asyǵa kútken «Qymyzmuryndyq – 2026» mádenı-kópshilik jáne sporttyq sharasy bastaldy. Atalmysh mereke abyz baba Álmerek Janshyqulynyń 368 jyldyǵymen qatar kelip, bıyl 5-ret uıymdastyrylyp otyr. Merekege elimizdiń túkpir-túkpirinen, Túrkıa, Ázirbaıjan, Qyrǵyzstan, Qytaı, Túrkmenstan, Ózbekstan, Qaraqalpaqstan Respýblıkasynan qonaqtar kelýde. Qymyz toıyna barlyǵy 35 myńǵa jýyq meıman qatysady dep kútilýde, – dep habarlaıdy Almaty oblysy ákiminiń baspasóz qyzmeti.
Tań sáriden Qarqara jaılaýyna jınalǵan jurtshylyq túrli baǵyttaǵy taqyryptyq alańdardy aralap kórdi. Júzden astam kıiz úıden quralǵan etnoaýylda qonaqtar qazaq halqynyń baı mádenıetinen syr shertetin kórmeni tamashalady. Sonymen qatar qolóner sheberleriniń, sýretshilerdiń týyndylary usynylyp, aýyl sharýashylyǵy tehnıkasy men jergilikti óndirýshilerdiń ónimderi tanystyryldy. Qolónerge qyzyǵatyn jandarǵa sheberlik saǵattary ótkizilýde. Ulttyq salt-dástúr men ádep-ǵuryptyń aıshyǵy bolǵan tarıhı jádigerler kórmesi de halyqtyń erekshe nazaryna ilikti.
Qymyz toıynda sondaı-aq ulttyq oıyndardan túrli saıystar ótkizilip, Myńjylqy atyrabyn dúbirge bóleýde. Atap aıtqanda, sportshylar at báıgesi, qazaq kúresi, alyptar saıysy, teńge ilý, asyq atý, qoı kóterý syndy jarystardan synǵa túsýde.
Sonymen birge «Topjarǵan» etno-óner ortalyǵynyń shoý baǵdarlamasy, «Tolaǵaı» óner ortalyǵynyń qoıylymdary, oblys ónerpazdary men tanymal estrada juldyzdarynyń konserti qonaqtarǵa kóterińki kóńil-kúı syılaýda. Balalarǵa arnalǵan aımaqta atraksıondar, qýyrshaq teatry, qolóner, sýret salý, shahmat jáne toǵyzqumalaq jarystary ótkizilýde. «Qymyzmuryndyqqa» kelgen kópshilik ulttyq sýsynymyz qymyzdan dám tatyp, ulttyq taǵamnan aýyz tıip, máre-sáre bolýda.
