Eýroparlament depýtatynyń sózinshe, Eýroparlamenttegi talqylaý Qazaqstannyń reformalardy júzege asyrýda aıtarlyqtaı nátıjege qol jetkizgenin kórsetti.
Eýroparlamentte «Jańa Qazaqstan: Konstıtýsıalyq referendýmnyń qorytyndylary jáne demokratıalyq jańǵyrý joly» atty pikirtalas ótti. Jıynda qatysýshylar Qazaqstandaǵy saıası reformalardy jáne Eýropalyq odaqpen aldaǵy yntymaqtastyqtyń keleshegin talqylady.
Eýroparlament depýtaty Tomash Zdehovskı Qazaqstannyń Ortalyq Azıadaǵy Eýropalyq odaqtyń negizgi seriktesteriniń biri ekenin aıtyp, bul áriptestik tek ekonomıkalyq emes, strategıalyq jáne saıası turǵydan da mańyzdy ekenin atap ótti.
Qazaqstan Ortalyq Azıadaǵy Eýropalyq odaqtyń basty seriktesteriniń birine aınaldy. Bul seriktestik ekonomıkalyq, strategıalyq jáne saıası baǵyttarda nyǵaıyp keledi. Alaıda shynaıy ári berik áriptestik tek ekonomıkalyq múddelerge ǵana negizdelmeıdi. Qazaqstan konstıtýsıalyq reformalar men saıası jańǵyrý úderisin jalǵastyryp jatqan kezde demokratıalyq basqarý, zań ústemdigi, ashyqtyq jáne azamattardyń qoǵamdyq ómirge qatysýy máseleleri boıynsha ashyq ári syndarly dıalogty saqtaý asa mańyzdy, – dedi Tomash Zdehovskı.
Eýrodepýtattyń aıtýynsha, Eýroparlamenttegi talqylaý Qazaqstannyń reformalardy júzege asyrýda aıtarlyqtaı nátıjege qol jetkizgenin kórsetti. Degenmen, alda atqarylatyn jumystar áli de bar. Ol Eýropalyq odaq pen Qazaqstan arasyndaǵy yntymaqtastyqty odan ári damytý eki negizgi baǵytqa súıenýi tıis ekenin aıtty. Olar – ekonomıkalyq áriptestikti nyǵaıtý jáne ortaq qundylyqtarǵa negizdelgen ózara yqpaldastyqty keńeıtý.
Tomash Zdehovskı pikirtalasqa qatysýshylarǵa mazmundy pikir almasqany úshin alǵys aıtyp, Eýropalyq odaqtyń Qazaqstanmen seriktestikti tereńdetýge, sondaı-aq turaqtylyq, órkendeý jáne demokratıalyq jańǵyrý máseleleri boıynsha ashyq dıalogty qoldaýǵa daıyn ekenin rastady.
İs-shara barysynda jarıalanǵan málimetke sáıkes, 2024 jyly Eýropalyq odaq pen Qazaqstan arasyndaǵy taýar aınalymy shamamen 45 mlrd eýroǵa jetken. Al eýropalyq ınvestısıalardyń kólemi 54 mlrd eýrodan asty.
