Mereı Abzalbekov Almaty qalasy İshki saıasat basqarmasynyń basshysy bolyp taǵaıyndaldy
Mereı Iagýduly Abzalbekov 1982 jylǵy 25 maýsymda dúnıege kelgen. Ál-Farabı atyndaǵy Qazaq ulttyq ýnıversıtetin «Tarıh» mamandyǵy boıynsha bitirgen, tarıh magıstri.
M. Abzalbekov eńbek jolyn Almaty qalasyndaǵy Á.H. Marǵulan atyndaǵy Arheologıa ınstıtýtynyń jetekshi ınjeneri bolyp bastap, Qonaev (Qapshaǵaı) qalasyndaǵy №32363 áskerı bóliminde ofıserlik quramda qyzmet etken.
Jastar saıasaty salasynda da belsendi qyzmet atqardy:
• Almaty qalasy Jastar saıasatyn damytý jónindegi memlekettik qory dırektorynyń orynbasary;
• Almaty qalasy Jastar saıasaty máseleleri jónindegi basqarmasynyń Jastar jobalary jáne shyǵarmashylyq bastamalar bóliminiń basshysy, basshynyń mindetin atqarýshy laýazymdaryn atqardy.
Almaty qalasy ákimi apparatynyń qurylymynda:
• Hattama, normatıvtik quqyqtyq aktilerdi tirkeý jáne resimdeý bóliminiń bas mamany;
• Áleýmettik-mádenı sala bóliminiń basshysy;
• Qoǵamdyq damý bóliminiń basshysy bolyp jumys istedi.
2023 jyldyń sáýir aıynan bastap osy ýaqytqa deıin Almaty qalasy ákimi apparaty basshysynyń orynbasary qyzmetin atqaryp keldi.
Eske sala keteıik, Almaty qalasy İshki saıasat basqarmasynyń burynǵy basshysy Aıdar Rahymjanuly Esenbekov (bul laýazymǵa 2024 jyldyń qańtarynda taǵaıyndalǵan bolatyn) 2026 jyldyń mamyr aıynyń sońynda Almaty qalasynyń Qoǵamdyq damý ortalyǵynyń basshysy bolyp taǵaıyndaldy.
