Abaı oblysynyń Aqsýat aýdanynda 5–7 maýsym aralyǵynda ótken «Asyl besik – Aqsýat» sport jáne óner festıvali bıyl da el nazaryn ózine aýdarǵan taǵylymdy jobalardyń birine aınaldy. Ulttyq sport, óner, bilim men rýhanıatty bir arnaǵa toǵystyrǵan aýqymdy shara úsh kún boıy Aqsýat óńirin dýmanǵa bólep, eldiń túkpir-túkpirinen kelgen jurtshylyqty ortaq qundylyqtar tóńiregine toptastyrdy. Bas demeýshi – ASSYLTAS qoǵamdyq qory
«Týǵan jerge týyńdy tik» degen taǵylymdy ustanymdy temirqazyq etken festıváldiń avtory ári bastamashysy – belgili kásipker, mesenat, ASSYLTAS qoǵamdyq qorynyń negizin qalaýshy, Aqsýattyń perzenti Dýlat Tursynuly Tastekeı. Onyń týǵan jerge degen janashyrlyǵy men azamattyq ustanymynan týǵan bul joba búginde eldik muratqa qyzmet etetin, ulttyq rýhty ulyqtaıtyn iri qoǵamdyq bastamaǵa aınaldy. 
Festıváldiń negizi 2019 jyly qalandy. Alǵashynda «Tuǵyry bıik Tarbaǵataı» ataýymen bastalǵan ıgi is ýaqyt óte kele mazmundyq jáne uıymdastyrýshylyq turǵydan jańa deńgeıge kóterilip, «Asyl besik – Aqsýat» festıvali retinde jalǵasyn tapty. Búginde bul joba týǵan jerdi túletýdiń, ulttyq qundylyqtardy dáripteýdiń jáne jas urpaqqa ónege kórsetýdiń jarqyn úlgisi retinde tanylyp otyr.
Bıylǵy festıvál baǵdarlamasy mazmuny men aýqymy jaǵynan burynǵydan da baı boldy. Úsh kún boıy Aqsýat tórinde ulttyq sporttyń dúbiri men ónerdiń órnegi, rýhanıattyń sáýlesi men bilimniń qundylyǵy qatar kórinis tapty.
Festıvál aıasynda alǵash ret toǵyzqumalaqtan respýblıkalyq týrnır uıymdastyryldy. Qazaq halqynyń zıatkerlik murasyna aınalǵan ulttyq oıynnan ótken jarysqa elimizdiń ár óńirinen halyqaralyq dárejedegi sport sheberleri, sport sheberleri jáne jas daryndar qatysty. Aqyl men parasat synǵa túsken doda toǵyzqumalaqtyń ómirsheńdigin taǵy bir márte dáleldep, ulttyq zıatkerlik sporttyń kókjıegin keńeıte tústi.
Festıváldiń basty sporttyq oqıǵalarynyń biri qazaq kúresinen ótken «ASSYL ARLAN – 2026» respýblıkalyq týrnıri boldy. Aqsýat tórine álem chempıondary, Azıa chempıondary, Qazaqstan chempıondary, «Qazaqstan Barysy» jáne «Álem Barysy» týrnırleriniń jeńimpazdary men júldegerleri jınalyp, kórermenderge joǵary deńgeıdegi tartysty beldesýler syılady. Sońǵy jyldary qazaq kúresiniń bedeldi dodalarynyń birine aınalǵan bul týrnır ulttyq sporttyń áleýetin aıqyn kórsetti.
Ulttyq at sporty túrlerinen ótken «ASSYL TULPAR» jobasy aıasyndaǵy báıge men aýdaryspaq jarystary da festıváldiń shyraıyn kirgizdi. Dalanyń darqan rýhyn, qazaqtyń jylqy mádenıetin aıshyqtaǵan jarystarda elimizdiń ár óńirinen kelgen shabandozdar men sáıgúlikter baq synady. Ulttyq sporttyń kórigin qyzdyrǵan bul básekeler kórermenderdiń erekshe yqylasyna ıe boldy.
Festıváldiń mańyzdy baǵyttarynyń biri – bilim men rýhanıat. Ótken jyly Dýlat Tastekeıdiń bastamasymen óńir jastaryna 14 myń dana kitap taratylyp, kitap oqýdy nasıhattaýǵa baǵyttalǵan aýqymdy aksıa júzege asyrylǵan bolatyn. Sol bastamanyń zańdy jalǵasy retinde bıyl «Artyq bilim – kitapta» oblystyq kitap oqý baıqaýy ótkizildi. Júzdegen oqýshy qatysqan bilim báıgesi jastardyń kitapqa degen qyzyǵýshylyǵyn arttyryp qana qoımaı, bilimdi ult qalyptastyrý jolyndaǵy mańyzdy qadamdardyń birine aınaldy. Baıqaý jeńimpazyna avtokólik tabystalýy bilim men parasatqa kórsetilgen aıryqsha qurmet retinde baǵalandy.
 
Jalpy festıvál aıasyndaǵy negizgi jobalardyń jeńimpazdaryna avtokólikterdiń tabystalýy ulttyq sportty, bilim men ónerdi qoldaýdyń naqty kórinisi boldy. Bul bastama jastardy úlken maqsattarǵa umtylýǵa jigerlendirip, qoǵamdaǵy eńbek pen talanttyń baǵalanýy tıis ekenin kórsetti.
Festıvál baǵdarlamasynda rýhanı mazmundaǵy sharalar da keńinen qamtyldy. Qasıetti Yrǵyzbaı ata kesenesine zıarat jasalyp, babalar rýhyna taǵzym etildi. Shyǵarmashylyq keshter, teatrlandyrylǵan qoıylymdar uıymdastyrylyp, festıvál gala-konsertpen túıindeldi. Elge tanymal óner maıtalmandary qatysqan mádenı keshter ulttyq ónerdiń qadir-qasıetin aıshyqtaı tústi.
Búginde «Asyl besik – Aqsýat» festıvali qarapaıym mádenı shara nemese sporttyq jarystar toptamasy ǵana emes. Ol – týǵan jerge taǵzym etýdiń, ulttyq bolmysty saqtaýdyń, urpaqtar sabaqtastyǵyn nyǵaıtýdyń jáne eldik sanany qalyptastyrýdyń úzdik úlgisine aınalǵan biregeı joba.
Aqsýatta ótken úsh kúndik mereke ulttyq rýhtyń máńgilik qundylyq ekenin taǵy bir márte dáleldedi. Ulttyq sporttyń dúbiri, ónerdiń órisi, kitaptyń qadiri men rýhanıattyń taǵylymy toǵysqan festıvál týǵan jerge qyzmet etýdiń jarqyn úlgisin kórsetti. Bul – ótkendi ulyqtap qana qoımaı, bolashaqqa baǵyt silteıtin, eldik murat pen ulttyq múddeni sabaqtastyrǵan taǵylymdy bastama.