13 shildede Qazaqstan Respýblıkasynda Ulttyq qaýipsizdik organdary kúni atap ótiledi – bul memlekettik múddelerdi qorǵaýdy qamtamasyz etetin, qazirgi zamanǵy qaterlerge qarsy turatyn jáne el men onyń azamattarynyń qaýipsizdigin kúzetetin qyzmetkerlerdiń kásibı merekesi.

Búgingi tańda ulttyq qaýipsizdik organdary qandaı syn-qaterlermen betpe-bet kelip otyrǵany, qazirgi jaǵdaıda olardyń jumysyn qandaı basymdyqtar aıqyndaıtyny, sondaı-aq qyzmettiń damýy, onyń kadrlyq áleýeti men negizgi qyzmet baǵyttary týraly biz Qazaqstan Respýblıkasy UQK Tóraǵasy, ulttyq qaýipsizdik general-leıtenanty Saǵymbaev Ermek Aldabergenulymen suhbattasatyn bolamyz. 

Sálemetsiz be, qurmetti Ermek Aldabergenuly. Kezdesýge múmkindik bergenińiz úshin alǵys aıtamyz jáne Sizdi, sondaı-aq barlyq jeke quramdy kásibı merekelerińizben quttyqtaımyz. 

Komıtet jumysy túsinikti sebeptermen jarıa etilmeıdi. Degenmen qupıalyq perdesin sál ashatyn bolsaq, UQK óziniń kásibı merekesine qandaı nátıjelermen jetip otyr? Sizdiń oıyńyzsha, búgingi tańda qazaqstandyq arnaýly qyzmettiń jaı-kúıi men áleýetin ne nárse kóbirek sıpattaıdy? 

Qaıyrly kún! Quttyqtaýyńyz úshin rızashylyǵymdy bildiremin. Bıyl Qazaqstan Respýblıkasynyń Ulttyq qaýipsizdik komıteti óziniń qurylǵanyna 34 jyl tolýyn atap ótýde. 

Osy ýaqyt ishinde Komıtet qalyptasý men damýdyń úlken jolynan ótip, úzdik dástúrler men urpaqtar sabaqtastyǵyn saqtaı otyryp, ozyq tehnologıalar men analıtıkalyq jáne jedel jumystyń jańa ádisterin belsendi engizetin zamanaýı arnaýly qyzmetke aınaldy.

Óz qyzmetinde UQK Memleket basshysynyń negizinde «Zań jáne tártip» qaǵıdaty jatqan Ádiletti Qazaqstandy qurý baǵdaryn dáıekti túrde iske asyrýda.

Bul memleketti syrtqy jáne ishki qaterlerden qorǵaýdy ǵana emes, sonymen qatar zań barlyǵy úshin baǵdar bolatyn, al azamattardyń qaýipsizdigi – eń joǵary basymdyqqa aınalatyn jaǵdaılardy qamtamasyz etýdi bildiredi.

Qazaqstandyq arnaýly qyzmettiń beınesi týraly suraqqa keletin bolsaq, búginde bul – óz qyzmetine sıfrlyq tehnologıalar men basqa da jańashyldyqtardy belsendi engizip jatqan, óziniń ǵylymı jáne bilim berý bazalary bar, qarqyndy damyp kele jatqan qurylym ekenin atap óteıin.

UQK – tek arnaıy operasıalar men qupıa ázirlemeler ǵana emes. Ulttyq qaýipsizdiktiń zamanaýı júıesi tereń taldaýdan, táýekelderdi ýaqtyly anyqtaýdan jáne oqıǵalardyń damýyn dál boljaýdan bastalady. Dál osy taldaý jumysy qaterlerdi aldyn ala anyqtaýǵa, olardyń tabıǵatyn túsinýge jáne jaǵymsyz senarılerdiń iske asýyna jol bermeý úshin sheshimder qabyldaýǵa múmkindik beredi.

Sondyqtan búginde Komıtette taldaý baǵytyn damytýǵa, zamanaýı sıfrlyq tehnologıalardy engizýge, úlken aýqymdaǵy derekterdi óńdeýge jáne boljaý ádisterin jetildirýge erekshe nazar aýdarylady. Bul tıimdi ǵana emes, sondaı-aq aldyn alý baǵytynda da áreket etýge múmkindik beredi. 

Árıne, jedel qyzmetkerler, shekarashylar, kıberqaýipsizdik mamandary, ushqyshtar, arnaıy bólimshelerdiń jaýyngerleri jáne taǵy basqalar burynǵysynsha asa mańyzdy ról atqarady.

Olardyń barlyǵy – árbir operasıanyń sáttiligi kásibılikke, úılesimdi jumys pen sapaly taldaýǵa negizdelgen memleketti qorǵaýdyń biryńǵaı kópdeńgeıli júıesiniń bir bóligi.

Bizdi bir qarapaıym aqıqatty túsiný biriktiredi: el qaýipsizdigi árbir qyzmetkerdiń jaýapkershiliginen, óz isine berilgendiginen jáne memleket pen onyń azamattarynyń múddesi úshin sheshim qabyldaýǵa daıyn bolýynan bastalady.

Siz atap ótkendeı, Komıtet qyzmetiniń ereksheligi belgili bir dárejede jabyqtyqty kózdeıdi. Eger qaýip erte kezeńde beıtaraptandyrylsa, qoǵam onyń qanshalyqty jaqyn bolǵanyn eshqashan bilmeıdi.

Búginde UQK dál osy qaǵıdatpen jumys isteıdi: tek saldarǵa nazar aýdaryp qana qoımaı, aldyn alý úshin áreket etý. Asqaq sózdersiz, jarıalylyqsyz jáne eń bastysy – qatelesýge quqyqsyz.

Qarqyndy ózgerip jatqan halyqaralyq jaǵdaı men jańa syn-qaterler men qaýipterdiń paıda bolýy jaǵdaıynda arnaýly qyzmetter jumysynyń tıimdiligi erekshe mańyzǵa ıe. UQK qazirgi qaterlerge qalaı beıimdeledi jáne memleket qaýipsizdigin qalaı qamtamasyz etedi ? 

Qazirgi jaǵdaıda ulttyq qaýipsizdik júıesi sapaly jańa syn-qaterlermen betpe-bet kelýde. Olar anaǵurlym kúrdeli, tehnologıalyq turǵydan damyǵan jáne kóbinese transulttyq sıpatqa ıe bola túsýde.

Eń ózekti syn-qaterlerdiń qatarynda halyqaralyq lańkestik pen ekstremızmdi, transulttyq qylmystyq toptardyń qyzmetin, kıberqaýipterdi, memlekettiń ishki prosesterine aralasý áreketterin, sondaı-aq zamanaýı tehnologıalardy quqyqqa qaıshy maqsattarda paıdalanýdy atap ótýge bolady.

Máselen, bıylǵy jyldyń mamyr aıynda «Ortalyq Azıa – Qytaı» formatyndaǵy quqyq qorǵaý organdarynyń kezdesýinde Qazaqstan Prezıdenti taıaý jyldardaǵy basty qaýipterdi – kıberqylmys pen jasandy ıntellekt feıkterinen bastap transulttyq qylmystyq jelilerge deıin naqty aıqyndap berdi.

Ol destrýktıvti kúshterdiń qolyndaǵy jasandy ıntellekttiń aqparattyq yqpal etý quralyna aınalýy múmkin ekenin erekshe atap ótti. Shyn máninde, aýqymdy sıfrlandyrý aıasynda biz kıbershabýyl ádisterin jetildirip jatqan halyqaralyq hakerlik toptar belsendiliginiń ósýin kórip otyrmyz.

Bizdiń jumysymyzda barlaý jáne qarsy barlaý dástúrli túrde basym oryn alady. Olardyń qyzmeti jasyryn qaterlerdi anyqtaýǵa, Qazaqstannyń múddelerin qamtamasyz etýge jáne sheteldegi el úshin táýekelderge monıtorıń júrgizýge baǵyttalǵan, sondaı-aq tyńshylyqqa jáne ishki turaqsyzdandyrýshy faktorlarǵa qarsy qalqan qyzmetin atqarady. 

Jekelegen sheteldik sýbektilerdiń bizdiń otandastarymyzdy quqyqqa qaıshy qyzmetke tartý áreketterin anyqtaý jáne olardyń jolyn kesý boıynsha kúndelikti jumys júrgizilýde.

Budan basqa, Komıtet halyqaralyq yntymaqtastyq jelisi boıynsha keń aýqymdy birlesken jumystar júrgizedi.

Qazirgi ýaqytqa deıin UQK TMD, Eýropa, Azıa jáne Taıaý Shyǵys elderin qosa alǵanda, shet memleketterdiń barlyq derlik jetekshi arnaýly qyzmetterimen ózara is-qımyl jasaıdy. 

Eń tyǵyz jáne jemisti qarym-qatynastar terorızmge qarsy is-qımyl jáne kıberqaýipsizdik salasynda baıqalady, turaqty túrde birlesken operasıalar ótkiziledi. Sondaı-aq ýaqtyly aqparat almasý jolǵa qoıylǵan.

Seriktesterdiń tikeleı kómegimen izdeýde júrgen adamdar anyqtalyp, otanyna qaıtaryldy, qylmystardyń joly kesildi.

Komıtet qyzmetiniń taǵy bir mańyzdy baǵyty sybaılas jemqorlyqqa qarsy is-qımyl bolyp tabylady. Bul jerde tek quqyq buzýshylyqtardyń naqty faktilerin anyqtaýǵa ǵana emes, sonymen qatar júıeli sybaılas jemqorlyq táýekelderiniń qalyptasýyna yqpal etetin sebepter men jaǵdaılardy joıýǵa basa nazar aýdarylady. 

Bul baǵyttardyń barlyǵy bir basty maqsatqa – ulttyq múddelerdi senimdi qorǵaýǵa jáne azamattardyń qaýipsizdigin qamtamasyz etýge baǵyndyrylǵan.

Búginde qazirgi zamanǵy qaterlerge qarsy turý tek memleket pen qoǵamnyń tyǵyz ózara is-qımyly arqyly ǵana múmkin bolady. Dál osy birlik, jaýapkershilik jáne zańdylyq qaǵıdattaryna ortaq ustanym turaqtylyqty saqtaýdyń jáne Qazaqstannyń ulttyq múddelerin senimdi qorǵaýdyń asa mańyzdy sharttary bolyp tabylady.

Qoǵamdaǵy qaýipsizdik seziminiń artynda yqtımal qaýipterdi anyqtaý jáne boldyrmaý boıynsha úlken jumys tur. Búgingi tańda UQK lańkestik jáne ekstremıstik sıpattaǵy táýekelderdiń aldyn alý júıesin qalaı quryp jatqanyn jáne bul baǵytta qandaı nátıjelerge qol jetkizilgenin tolyǵyraq aıtyp bere alasyz ba?

Terorıstik qurylymdar óz qyzmetin qarjylandyrý, úılestirý jáne adamdardy tartý úshin sıfrlyq ortany, atap aıtqanda jasandy ıntellektini belsendi paıdalana otyryp, qazirgi zamanǵy shynaıylyqqa tez beıimdeledi.

Mundaı jaǵdaıda terorızmge qarsy kúres júıeli jáne keshendi sıpatqa ıe.

Komıtet turaqty negizde aldyn alý sharalary keshenin iske asyrady, radıkaldy ıdeologıanyń yqpalyna túsken adamdardy anyqtaý boıynsha jedel jumys júrgizedi, qarjylandyrý arnalary men ekstremıstik materıaldardy taratý áreketteriniń jolyn kesedi.