Búgin, 31 mamyr kúni Almatydaǵy «Qaraǵaıly» saıabaǵynda 1931-1933 jyldardaǵy asharshylyq qurbandaryna arnalǵan eskertkishke gúl shoqtaryn qoıý rásimi ótti. İs-shara Saıası qýǵyn-súrgin jáne asharshylyq qurbandaryn eske alý kúnine oraı uıymdastyryldy.
Oǵan Almaty qalasynyń ákimi Darhan Satybaldy, qala basshylyǵy, máslıhat depýtattary, Qoǵamdyq keńes músheleri, qoǵam qaıratkerleri, tarıhshylar, qalamgerler, jastar jáne qala turǵyndary qatysty.
Rásimge qatysýshylar saıası qýǵyn-súrgin men asharshylyq qurbandaryn bir mınýt únsizdikpen eske alyp, eskertkishke gúl shoqtaryn qoıdy.
31 mamyr — Qazaqstan tarıhyndaǵy taǵylymy tereń kúnderdiń biri. Bul kúni saıası qýǵyn-súrgin men asharshylyq náýbetiniń qurbany bolǵan mıllıondaǵan adamnyń rýhyna taǵzym etiledi. Táýelsizdik jyldarynda tarıhı ádildikti qalpyna keltirý, jazyqsyz japa shekken azamattardy aqtaý jáne ótkenniń qasiretti kezeńderin urpaq jadynda saqtaý baǵytynda aýqymdy jumystar atqaryldy.
Almatyda osy aıtýly dataǵa oraı is-sharalar kúni boıy jalǵasady. Sonymen qatar osy kúnderi shaharda ǵylymı konferensıalar, dóńgelek ústelder, tarıhı-aǵartýshylyq dárister, kitap jáne fotokórmeler, jastardyń zıaly qaýym ókilderimen kezdesýleri jáne ózge de taǵylymdyq is-sharalar uıymdastyrylǵan.
