Halyqaralyq balalardy qorǵaý kúnine oraı Almatydaǵy barlyq medısınalyq mekemede balalar men jasóspirimderdiń densaýlyǵyn nyǵaıtýǵa, salaýatty ómir saltyn nasıhattaýǵa jáne túrli aýrýlardyń aldyn alýǵa arnalǵan ashyq esik kúnderi ótedi. Bul týraly Almaty qalalyq Qoǵamdyq densaýlyq saqtaý basqarmasynyń ókilderi habarlady.

Búldirshinder men olardyń ata-analaryna pedıatr, stomatolog, travmatolog, ınfeksıonıst, nevropatolog, LOR dárigeri, akýsher-gınekolog jáne ózge de salalyq mamandar tegin keńes beredi. İs-sharalarǵa jetekshi sarapshylar, ǵylymı qyzmetkerler jáne shtattan tys bas mamandar qatysady.

Sonymen qatar, qaladaǵy medısınalyq uıymdarda profılaktıkalyq jáne aqparattyq-túsindirý sharalary, ata-analar men jasóspirimderge arnalǵan pikir almasý alańdary, sýret baıqaýlary men mádenı-kópshilik baǵdarlamalar uıymdastyrylady. Bul bastamaǵa salaýatty ómir saltyn qalyptastyrý ortalyqtary men Jastar densaýlyq ortalyqtary da atsalysady.

Ásirese, erekshe qajettiligi bar balalar men dıspanserlik esepte turǵan balalarǵa erekshe kóńil bólinedi. Olar úshin keńestik kómektiń qoljetimdiligi keńeıtilip, erekshe qajettiligi bar balalarǵa úı jaǵdaıynda kóshpeli medısınalyq tekserýler júrgiziledi.

İs-sharalardyń basty maqsaty — balalar men jastar arasynda fızıkalyq, psıhıkalyq jáne reprodýktıvtik densaýlyqqa qaraý mádenıetin qalyptastyrý.

Ashyq esik kúnderiniń tolyq baǵdarlamasymen turǵyndar Almatydaǵy medısınalyq uıymdardyń resmı saıttary men áleýmettik jelidegi paraqshalarynan, sondaı-aq emdeýshi dárigerlerinen bile alady.