Alataý aýdany Saıaly shaǵynaýdanynda «JİGER» ınovasıalyq shyǵarmashylyq jáne oqýshylardy damytý ortalyǵy jumysyn bastady. Halyqaralyq balalardy qorǵaý kúnine oraı uıymdastyrylǵan saltanatty ashylý rásimine Almaty ákimi Darhan Satybaldy qatysty.
Qosymsha bilim berýge arnalǵan jańa nysan qaladaǵy balalardyń bilim alýyna, shyǵarmashylyqpen aınalysýyna, sportpen shuǵyldanýyna jáne jan-jaqty damýyna múmkindik beretin eń iri zamanaýı ortalyqtardyń birine aınaldy. Joba jergilikti búdjet qarajaty esebinen júzege asyryldy. Keshenniń jalpy aýmaǵy 10,6 myń sharshy metrden asady, al jobalyq qýattylyǵy eki aýysymda kúnine 1350 balaǵa deıin qabyldaýǵa múmkindik beredi.
Ortalyqta qosymsha bilim berýdiń suranysqa ıe baǵyttary boıynsha barlyq jaǵdaı jasalǵan. Munda oqýshylar robototehnıka, elektronıka, radıobaılanys, 3D modeldeý jáne prototıpteý kabınetterinde bilim ala alady. Sonymen qatar FABLAB zerthanasy, beıneleý óneri, mýzyka, horeografıa jáne medıa shyǵarmashylyq stýdıalary jumys isteıdi.
Balalardyń zıatkerlik damýyna da erekshe kóńil bólingen. Ortalyqta planetarıı, oqý zaly, shahmat, doıby jáne toǵyzqumalaq sekildi ústel oıyndaryna arnalǵan kabınetter, sondaı-aq jobalyq jáne zertteý jumystaryna beıimdelgen zamanaýı bilim berý keńistikteri qarastyrylǵan.
Sporttyq jáne ınklúzıvti baǵyttar da keshenniń mańyzdy bóligine aınaldy. Munda baseın, boks, kúres, dzúdo, taekvondo jáne karate zaldary jabdyqtalǵan. Erekshe bilim berý qajettiligi bar balalar úshin sensorlyq bólme, psıholog, logoped jáne defektolog kabınetteri, arnaıy baseın men psıhologıalyq-pedagogıkalyq qoldaý kórsetý keńistikteri ashylǵan.
Ortalyqtaǵy taǵy bir mańyzdy baǵyt — ekologıalyq jáne agrotehnologıalyq bilim berý. Osy maqsatta jylyjaı, agromádenıet, baǵbandyq jáne akvaponıka kabınetteri jasaqtalyp, oqýshylar turaqty damýdyń zamanaýı tehnologıasymen tanysa alady.
Jańa ortalyqtyń ashylýy Alataý aýdany turǵyndary úshin kópten kútken qýanyshty oqıǵa boldy. Qazaqstan Respýblıkasynyń eńbek sińirgen mádenıet qaıratkeri Omarqazy Bolatbaevtyń aıtýynsha, «JİGER» balalardyń damýy men ózin-ózi tanytýyna jańa múmkindik beredi.
«Men osy shaǵynaýdanda kóp jyldan beri turamyn. Búgin barlyq turǵyn sekildi balalarǵa arnalǵan úlken shyǵarmashylyq ortalyǵynyń ashylǵanyna erekshe qýanyp otyrmyn. Munda sportpen aınalysýǵa, shyǵarmashylyqty damytýǵa jáne jańa daǵdylardy meńgerýge tolyq jaǵdaı jasalǵan. Bul búkil aýdan úshin mańyzdy ári kópten kútken oqıǵa», — dedi ol.
Kópbalaly ana Nurjamal Túmenbaeva da jańa ortalyqtyń otbasylar úshin asa qajet ekenin aıtty.
«Bizdiń aýdanda osyndaı ortalyqtyń ashylǵanyna óte qýanyshtymyz. Balalarymyz úshin osyndaı múmkindik jasaǵandaryńyzǵa alǵys aıtamyn. Bul jer balalardyń jańa bilim alyp, qabiletin damytyp, ýaqytyn tıimdi ótkizetin mańyzdy ortalyqqa aınalatynyna senemin», — dedi ol.
Jańa nysanǵa oqýshylardyń ózderi de oń baǵasyn berdi. Oqýshy Aqnıet Toqsambaı ortalyqtyń alǵashqy kúnnen erekshe áser qaldyrǵanyn aıtty.
«Búgin bizdi ortalyqtyń ashylýyna shaqyrdy. Alǵashqy sátten-aq onyń zamanaýı, jaryq ári óte ádemi ekenin baıqadym. Munda túrli baǵyttaǵy úıirmeler kóp jáne qabiletimizdi damytýǵa barlyq jaǵdaı jasalǵan», — dedi ol.
Al Aısha Toqsambaeva jańa ortalyqtaǵy erekshe atmosferany atap ótti.
«Búgin ortalyqtyń ashylýyna qatysyp, erekshe áser aldym. Esikten kirgennen-aq jyly atmosfera seziledi. Barlyǵy uqypty ári ádemi jasalǵan. Ár bólme ózinshe qyzyqty, nazardy birden aýdardy», — dedi oqýshy.
Altynshy synyp oqýshysy Aıala Oralbaı ortalyqtyń ashylý kúni uıymdastyrylǵan kórmege qatysqanyn aıtty.
«Búgin kórmede ózim jasaǵan Almaty qalasynyń maketin tanystyrdym. Bolashaqta «JİGER»ortalyǵynda bilim alyp, úlken tájirıbe jınaǵym keledi», — dedi ol.
«JİGER» ortalyǵynyń ashylýy Almatydaǵy bilim berý ınfraqurylymyn damytý jáne jas urpaqtyń jan-jaqty damýyna jaǵdaı jasaý baǵytyndaǵy mańyzdy qadamdardyń biri boldy. Sońǵy bir jyl ishinde Almaty ákiminiń tapsyrmasymen qalada 40 myńǵa jýyq orynǵa arnalǵan 37 bilim berý nysany paıdalanýǵa berildi. Olardyń qatarynda jańa mektepter, balabaqshalar, qosymsha bilim berý ortalyqtary men kolejder bar.
