Qonaevta 1 maýsymnan bastap shomylý maýsymy resmı túrde ashyldy. Bıyl jaǵajaılarda qaýipsizdik sharalary kúsheıtilip, jańa demalys oryndary iske qosyldy.
Qala ákimi Asqat Berdihanovtyń aıtýynsha, komýnaldyq jaǵajaılar demalýshylardy qabyldaýǵa daıyn. Ásirese №5 jaǵajaıda qaýipsizdik máselesine erekshe kóńil bólingen. Munda 12 qutqarý munarasy ornatylyp, 26 qutqarýshy jumys isteýde. Sonymen qatar jaǵajaı aýmaǵyna 21 beınebaqylaý kamerasy qoıylǵan. Onyń ishinde jasandy ıntellekt júıesimen jumys isteıtin kameralar da bar. Barlyq qurylǵylar jedel basqarý ortalyǵyna qosylǵan.
Jaǵajaı aýmaǵynda sanıtarlyq toraptar men tamaqtaný oryndary jumys isteıdi. Kún saıyn arnaıy qyzmetkerler jaǵalaýdy birneshe ret qoqystan tazartady. Al jaıaý júrginshiler úshin kirý tegin.
Bıyl №5 jaǵajaıda jańa 9D kınoteatry ashyldy. Zamanaýı atraksıon formatyndaǵy kınoteatrda kórermender fılmdi arnaıy dybys, qozǵalys jáne ózge de effektiler arqyly shynaıy sezine alady.
Sonymen qatar qalada jańa oıyn-saýyq oryndary kóbeıip keledi. Qala ákiminiń málimetinshe, «Jibek Joly» JSHS salyp jatqan atraksıondar parki 10 maýsymǵa qaraı kelýshilerge esigin ashady.
«Bul park birneshe jyldan beri salynyp jatyr. Qazir sońǵy daıyndyq jumystary aıaqtalýda. Jaqyn kúnderi demalýshylardy qabyldaı bastaıdy», – dedi Asqat Berdihanov.
Qalada bıyl jańa formattaǵy demalys oryndary da ashylýda. Sonyń biri – «VE RICCI» demalys aımaǵy. Keshen otbasylyq demalysqa arnalǵan. Munda jaıly vıllalar, baseınder jáne tynyǵýǵa arnalǵan arnaıy aýmaqtar qarastyrylǵan.
Ákimniń aıtýynsha, týrısik baǵytta 11 ınvestısıalyq jobany júzege asyrý josparlanyp otyr. Onyń ishinde qonaq úıler, demalys oryndary men gólf-klýb qurylysy bar.
Qaýipsizdik máselesi de basty nazarda. Qalalyq tótenshe jaǵdaılar basqarmasy jaǵajaılarda keshki saǵat 20:00-den keıin shomylýǵa tyıym salynatynyn habarlady. Kún saıyn patrúldeý uıymdastyrylyp, keshki ýaqytta arnaıy reıdter júrgiziledi.
Qala turǵyndary men týrıser de shomylý maýsymynyń ashylýyn oń qabyldaýda. Ashyq sýda júzýden Qazaqstan jáne álem chempıony Amına Shynádil Qapshaǵaı sý qoımasy sý sporty úshin qolaıly oryndardyń birine aınalyp kele jatqanyn aıtty.
«Qapshaǵaı sý qoımasy – tek demalys orny emes, sý sporty damyp jatqan mańyzdy aımaq», – dedi sportshy.
Aıta keteıik, Qonaevta aldaǵy ýaqytta 5 shaqyrymnan astam jaǵajaıdy abattandyrý josparlanǵan. Jumystar kezeń-kezeńimen júzege asady.