Almaty oblysynda ekologıalyq týrızmdi damytý jáne jasyl aımaqtardyń kólemin ulǵaıtý baǵytynda birneshe iri ekopark jobasy júzege asyrylýda. Jańa nysandarǵa tartylatyn ınvestısıa kólemi 22 mlrd teńgeden asady.
Qazirgi tańda oblys aýmaǵynda jalpy kólemi 69 myń gektardan asatyn 20-dan astam ekopark jumys isteıdi. Aldaǵy jyldary olardyń qatary jańa demalys jáne rekreasıalyq aımaqtarmen tolyqpaq.
İri jobalardyń biri – aýmaǵy 10 gektar bolatyn «Barys» ekoparki. Jobanyń quny shamamen 1,5 mlrd teńgeni quraıdy. Bolashaqta park aýmaǵynda 7 myńnan astam aǵash otyrǵyzý josparlanǵan.
Sonymen qatar jeke ınvestısıalar esebinen taǵy eki iri joba iske asyrylýda. Aýmaǵy 5,5 gektar bolatyn «Tal Resort» ekoparkiniń quny shamamen 5 mlrd teńgeni quraıdy. Qurylys jumystary eki kezeńmen júrgiziledi. Jobanyń birinshi kezeńin 2026 jyldyń sońynda aıaqtaý, al nysandy tolyq paıdalanýǵa berýdi 2027 jylǵa josparlanǵan.
Sondaı-aq quny 5 mlrd teńge bolatyn «Aykan Resort» ekoparkiniń qurylysy da júrgizilýde. Jobanyń jalpy aýmaǵy 8,5 gektardy quraıdy. Nysandy 2027 jyly paıdalanýǵa berý kózdelgen.
Budan bólek, 2027–2028 jyldary oblysta taǵy eki joba júzege asyrylady. Atap aıtqanda, «Kóshpendiler» ekoparkine shamamen 700 mln teńge, al «Ortalyq saıabaq» jobasyna shamamen 10 mlrd teńge ınvestısıa tartý josparlanyp otyr.
Almaty oblysy turǵyn úı-kommýnaldyq sharýashylyq jáne abattandyrý basqarmasynyń málimetinshe, atalǵan jobalar óńirdiń týrısik áleýetin arttyryp, jasyl aımaqtardy keńeıtýge jáne halyq úshin qolaıly demalys ınfraqurylymyn qalyptastyrýǵa múmkindik beredi.