Almaty oblysynda jedel medısınalyq járdem qyzmetiniń avtoparki aýqymdy jańartýdan ótýde. Medısına qyzmetkerleri kúni qarsańynda óńirdiń jedel medısınalyq járdem stansıasyna 70 jańa sanıtarıalyq avtokóliktiń kilti tabystalady. Qazirgi ýaqytta avtokólikterdiń qujattaryn rásimdeý jumystary júrgizilýde.
Jańa tehnıkalar 2025 jyly lızıń sharty negizinde satyp alynǵan. Onyń ishinde 30-y «S» klasyndaǵy reanımobıl, al 40-y «V» klasyndaǵy sanıtarıalyq avtokólik. Barlyǵy zamanaýı medısınalyq jabdyqtarmen tolyq qamtamasyz etilgen jáne shuǵyl kómek kórsetýge beıimdelgen.
Osylaısha, bıyl Almaty oblysynyń jedel medısınalyq járdem qyzmeti úshin satyp alynǵan 90 sanıtarıalyq avtokóliktiń barlyǵy paıdalanýǵa beriledi. Onyń 20-sy jyl basynda medısınalyq uıymdarǵa tapsyrylsa, qalǵan 70 kólik jaqyn kúnderi qyzmetke kirisedi.
Almaty oblysy Densaýlyq saqtaý basqarmasynyń basshysy Erjan Súleımenovtiń aıtýynsha, avtoparkti jańartý turǵyndarǵa kórsetiletin jedel medısınalyq kómektiń sapasy men qoljetimdiligin arttyrýǵa múmkindik beredi.
«Jedel medısınalyq járdem qyzmetiniń materıaldyq-tehnıkalyq bazasyn jańartý jumystary kezeń-kezeńimen jalǵasýda. Jańa sanıtarıalyq avtokólikter shalǵaı eldi mekenderge der kezinde jetýge, shaqyrtýlarǵa jedel áreket etýge jáne medısınalyq kómektiń sapasyn jaqsartýǵa múmkindik beredi. Bul — turǵyndardyń qaýipsizdigi úshin jasalyp jatqan mańyzdy jumys», — dedi Erjan Súleımenov.
Jedel járdem qyzmetiniń avtoparkin jańartýǵa bıznes ókilderi de qoldaý kórsetip keledi. Ótken jyly áleýmettik jaýapkershilik aıasynda «Mareven Food» JSHS jedel medısınalyq járdem qyzmetine gýmanıtarlyq kómek retinde «V» klasyndaǵy 10 Foton markaly sanıtarıalyq avtokólikti tabystaǵan bolatyn.
Qazirgi tańda Almaty oblysynda jedel medısınalyq kómekti 1 stansıa, 12 qosalqy stansıa, aýyldyq eldi mekenderdegi 66 dıslokasıalyq pýnkt jáne 1 sanıtarıalyq avıasıa bólimshesi kórsetedi. Óńirde 147 jedel medısınalyq járdem brıgadasy jumys isteıdi. Onyń ishinde 20 dárigerlik jáne 127 feldsherlik brıgada bar.