Yokohama, Triangle shınalarynyń dıstrıbútory – SAN tyres kompanıasy Almaty oblysynda jańa SAN Baiserke logıstıkalyq habyn iske qosty. Shına saqtaýǵa arnalǵan aýqymdy keshen TMD keńistigindegi eń iri jobalardyń biri sanalady.
Jobanyń jalpy ınvestısıalyq quny – 8 mlrd teńge. Búginde onyń 3,5 mlrd teńgesi ıgerilgen. Investısıanyń qalǵan bóligi jobanyń kelesi kezeńderine, sonyń ishinde SAN Village turǵyn úı kesheni men ózge de ınfraqurylymdyq nysandardyń qurylysyna baǵyttalmaq.
SAN Baiserke logıstıkalyq ortalyǵy jylyna 3,5 mıllıonǵa deıin shına qabyldap, saqtap jáne jónelte alady. Jańa hab arqyly avtokólik shınalary Almaty oblysynan Qazaqstannyń barlyq óńirine, Ortalyq Azıa elderine, sondaı-aq alys-jaqyn shetelderge turaqty túrde jetkiziletin bolady.
Keshenniń jalpy aýmaǵy – 22,6 gektar. Munda zamanaýı qoımalar, qaıta óńdeý zaýyty, keńse ǵımarattary, shına satý ortalyǵy jáne servıstik qyzmet kórsetý nysandary ornalasqan. Bul ónimdi qabyldaý, saqtaý jáne jóneltý úderisterin bir aýmaqta tıimdi uıymdastyrýǵa múmkindik beredi.
Jobada qyzmetkerlerdiń áleýmettik jaǵdaıyna da erekshe kóńil bólingen. Hab janynda 180 oryndyq jataqhana, asqana, demalys bólmeleri, kitaphana jáne sport alańy bar. Sonymen qatar qyzmetkerlerdiń tynyǵýyna arnalǵan 12 myń sharshy metrlik saıabaq qarastyrylǵan.
Aldaǵy ýaqytta kompanıa qyzmetkerleri men olardyń otbasylary úshin **SAN Village** turǵyn úı keshenin salý josparlanyp otyr. Sondaı-aq balabaqsha ashý kózdelgen.
SAN tyres kompanıasy Qazaqstan naryǵynda 20 jyldan beri jumys isteıdi. Osy ýaqyt aralyǵynda 14,5 mıllıonnan astam shına satylǵan. Kompanıa jyl saıyn memlekettik búdjetke 10 mlrd teńgeden astam salyq tóleıdi.
Jańa logıstıkalyq habtyń iske qosylýy Qazaqstannyń kólik-logıstıka áleýetin arttyryp, ónim jetkizý merzimin qysqartýǵa múmkindik beredi. Sonymen qatar joba halyqaralyq saýda baılanystaryn keńeıtýge, jańa jumys oryndaryn qurýǵa, ınvestısıa tartýǵa jáne óńirdiń logıstıkalyq ınfraqurylymyn damytýǵa yqpal etedi.
