Qazaqstan kınogerler odaǵynyń basqarma múshesi, ónertanýshy ári kınodramatýrg Erlan Tóleýtaı Premer-mınıstrdiń birinshi orynbasary Nurlybek Nálibaevqa shuǵyl hat joldady. Onyń aıtýynsha, Almaty ákimdigi kınogerlermen kelisimsiz Sháken Aımanov atyndaǵy «Qazaqfılm» aýmaǵynyń 5,5 gektaryna «Kınematografıster parkin» salý josparlanǵanyn kórsetetin qurylys pasportyn kınostýdıa qaqpasyna ilgen.
Kınogerler bul áreketti burynǵy jyldardaǵy «jerdi ıemdený» áreketteriniń jalǵasy dep sanaıdy. Olardyń aıtýynsha, buǵan deıin de osy aýmaqqa qatysty daýlar bolǵan, al Prezıdent Qasym-Jomart Toqaev bul máselege tosqaýyl qoıyp, jerdiń qaıtarylýyna yqpal etý týraly tapsyrma bergen edi. Alaıda, «Qańtar oqıǵasynan» keıin bul is sońyna deıin jetpeı qalǵan.
Erlan Tóleýtaı bul jaǵdaıdy kınostýdıa jeriniń taǵdyryna qatysty alańdatarlyq másele dep baǵalap, «Qazaqfılm» aýmaǵyn qurylys nysandaryna berýge jol bermeýdi surady.
«Biz – kınogerler qaýymy buǵan qarsymyz ári kınostýdıanyń bir súıem jerin talan-tarajǵa salýǵa jol bermeıtinimizdi málimdeımiz!» – dedi ol.
Ol buǵan deıin de kınostýdıanyń 5,5 gektar jerine qatysty daý bolǵanyn eske salyp, máseleni túpkilikti sheshý úshin Nurlybek Nálibaevtan kınogerlermen kezdesýdi jáne jaǵdaıǵa arasha túsýdi ótindi.
«Qazaqfılm» tóńiregindegi daý-damaı buǵan deıin de birneshe ret kóterilgen bolatyn. Aıta keteıik, Qazaqstan Respýblıkasynyń Mádenıet jáne aqparat mınıstrligi Ulttyq «Qazaqfılm» kınostýdıasynyń barlyq negizgi óndiristik nysandary memleket menshiginde qalatynyn resmı túrde málimdedi.
