İle Alataýynyń bókterinde qalyqtaǵan ushaqtar, joǵary pılotaj elementteri, toptyq ushýlar men parashútshilerdiń bıikten sekirýi – Almaty oblysynda dástúrli «Baıserke aspany» áýe shoýy ótti. Bıyl kórermenge áserli avıasıalyq baǵdarlama usynylyp qana qoımaı, aldaǵy Quryltaı depýtattarynyń saılaýyna da nazar aýdaryldy.
23 tamyzǵa belgilengen daýys berýge bir aptadan az ýaqyt qaldy. Osyǵan oraı 10 myńnan astam kórermen jınalǵan áýe shoýynda jurtshylyqqa aldaǵy saılaý týraly da úndeý jasaldy. Áýe aılaǵyna kásibı ushqyshtar, parashútshiler, avıasıa salasynyń mamandary men óńirdiń myńdaǵan turǵyny jınaldy. Olardyń arasynda otbasymen kelgender de kóp.
Áýe shoýynyń eń áserli sátteriniń biri – Qazaqstannyń Memlekettik týyn alyp ushqan Mı-2 tikushaǵynyń kókke kóterilýi boldy. Artynsha tikushaq «Jańarýǵa daýys ber!» degen jazýy bar bannerdi alyp ushty. Bul áýe perfomansy Quryltaı depýtattarynyń alǵashqy saılaýyna arnaldy. Uıymdastyrýshylar kórermenderdi azamattyq belsendilik tanytyp, 23 tamyzda daýys berýge qatysýǵa shaqyrdy.
Odan keıin áýe shoýynyń negizgi baǵdarlamasy bastaldy. Kórermender kúni boıy túrli áýe kemeleriniń múmkindikterin tamashalady. Aspanǵa Mı-2 tikushaǵy, An-2, Socata, Iak-18T, Iak-52 jáne Iak-55 ushaqtary, sondaı-aq motodeltaplandar kóterildi. Ushqyshtar jeke jáne toptyq ushýlar jasap, joǵary pılotaj elementterin kórsetti. Keıbiri sap túzep ushsa, endi biri aspanda tútin izderin qaldyrdy. Ushýlar 100-den 1400 metrge deıingi bıiktikte oryndaldy. Baǵdarlamanyń taǵy bir áserli bóligi – An-2 ushaǵynan parashútshilerdiń sekirýi boldy. Olar 1000 metrden astam bıiktikten sekirdi.
Jerdegi baǵdarlama da qyzyqqa toly boldy. Aerodrom aýmaǵynda avıasıalyq tehnıka kórmesi uıymdastyrylyp, qonaqtar túrli tıptegi ushaqtar men tikushaqtardy jaqynnan kórip, olardyń qurylymymen tanysty. Sondaı-aq ushqyshtar men avıasıa salasynyń ózge de mamandarynyń jumysy týraly aqparat aldy. Kórme ásirese balalar men jastardyń erekshe qyzyǵýshylyǵyn týdyrdy.
Aıta keteıik, áýe shoýyna Qazaqstannyń ushqysh-ǵaryshkeri Aıdyn Aıymbetov, «Otan» aeroklýby qoǵamdyq birlestiginiń jetekshisi Iýrıı Elsov, «Tán-SHan» avıasıalyq ortalyǵynyń bas dırektory Vladımır Ansýpov, Qazaqstan shaǵyn avıasıa qaýymdastyǵynyń prezıdenti Ómirbek Keńesbaev, sondaı-aq avıasıa qaýymdastyǵynyń ókilderi qatysty.
İs-sharanyń negizgi taqyryptarynyń biri – Qazaqstandaǵy shaǵyn avıasıany damytý boldy. Qatysýshylar jastar arasynda avıasıalyq jáne tehnıkalyq mamandyqtardy tanymal etý, avıasıalyq mádenıetti qalyptastyrý jáne salany odan ári damytý máselelerin talqylady. Sondaı-aq mundaı is-sharalardyń Almaty oblysynyń týrısik tartymdylyǵyn arttyrýdaǵy áleýetine erekshe nazar aýdaryldy.
Qonaqtar úshin oıyn-saýyq jáne ınteraktıvti alańdar jumys istep, túrli utys oıyndary men DJ-setter uıymdastyryldy. Kelýshiler kúni boıy áýe kemeleriniń ushýyn tamashalap, avıasıalyq tehnıkamen tanysyp, sala mamandarymen tildese aldy.
Osylaısha, dástúrli «Baıserke aspany» áýe shoýy bıyl da óńirdegi kópshilik asyǵa kútken aýqymdy sharalardyń birine aınaldy. Bıylǵy sharada kórermender áýe tehnıkasynyń múmkindigi men ushqyshtardyń sheberligin tamashalap, avıasıa salasymen jaqynyraq tanysty. Sonymen qatar mańyzdy úndeý de aıtyldy: 23 tamyzda qazaqstandyqtar elimizdiń jańa bir palataly Parlamenti – Quryltaı depýtattarynyń alǵashqy saılaýyna qatysady.
