Óńirlik komýnıkasıalar qyzmetiniń uıymdastyrýymen Naýryzbaı aýdanynda BAQ ókilderine arnalǵan baspasóz týry ótti. Aýdan ákimi Názıra Toǵyzbaeva jýrnalısermen birge nysandardy aralap, aýdandaǵy iske asyp jatqan negizgi jobalardy, alǵa qoıǵan jospary týraly baıandap berdi. 

Baspasóz týrynda birinshi jol túsken nysan Qalqaman-2 shaǵyn aýdanyndaǵy turǵyn úı kesheni boldy. Munda 2029 jylǵa deıingi turǵyn úı-kommýnaldyq ınfraqurylymdy damytý tujyrymdamasy aıasynda halyqqa qyzmet kórsetý nysany bar kóp páterli turǵyn úı salatyn úlken jobany qolǵa alypty.

2024 jyldyń sáýir aıynda bastalǵan jobanyń bas merdigeri – «QazQurylysPodrád» JSHS. Nysandy bıylǵy tamyz aıynda tabystamaq.  

Aýdan ákiminiń aıtýynsha, áleýmettik mańyzy zor bul joba almatylyqtardy qoljetimdi ári jaıly turǵyn úımen qamtamasyz etpek. Qazir jeti jerde aýdany 34 myń sharshy metrden asatyn 594 páterli turǵyn úı boı kóterdi.

«Memleket basshysy birneshe ret atap ótkendeı, sapaly ári qoljetimdi ınfraqurylym men qoljetimdi turǵyn úı salý basym baǵyt bolyp otyr. Naýryzbaı aýdanynda sońǵy bes jylda áleýmettik osal toptarǵa ǵana 5600-den astam páter berildi. Sońǵy úsh jylda bir mıllıon sharshy metrden astam turǵyn úıdi tapsyrdyq. Sonyń ishinde 710 myń sharshy metrden astamy – ekonom-klass sanatyndaǵy turǵyn úı», – deıdi aýdan basshysy.

Jańa turǵyn úı kesheninde 184 bir bólmeli, 248 eki bólmeli jáne 162 úsh bólmeli páter qarastyrylǵan. İshki qurylys pen árleý jumysy tolyq bitken. Endi aýmaqty abattandyra bastady. Atap aıtqanda, jaıaý júrginshiler joly salynyp, turǵyndarǵa qolaıly bolýy úshin aýlany kógaldandyryp jatyr.  

Baspasóz týry barysynda jýrnalıser qurylys jumysynyń aıaq alysymen tanysyp, turǵyn úılerdiń daıyndyq deńgeıin kórip, merdiger uıym men aýdan ákimdigi ókilderine suraq qoıdy.

«Bul turǵyn úı keshenindegi páterler óte qolaıly. Joba toǵyz qabatty jeti turǵyn úıden turady. Munda barlyq qajetti jaǵdaı jasalǵan. Ár úıde jolaýshy men júk lıftisi ornatylǵan. Páterlerdi árlep baryp tapsyrady. Bul turǵyndarǵa artyq kúsh jumsamaı, birden qonystanýǵa múmkindik beredi», – dedi «QazQurylysPodrád» JSHS ókili Dıas Qabdyǵalıev.

Názıra Toǵyzbaevanyń aıtýynsha, turǵyn úı ınfraqurylymyn damytý Naýryzbaı aýdanynda basym baǵyttyń biri bolyp qala bermek. Bul aýdan qaladaǵy eń jyldam damyp kele jatqan aýdannyń biri sanalady. Osyndaı jobalardy iske asyrý turǵyn úı qoryn ulǵaıtyp qana qoımaı, qajetti áleýmettik jáne ınjenerlik ınfraqurylymy bar qalalyq keńistikti qalyptastyrýǵa múmkindik beredi.

«Qazir aýanda 176 kóppáterli turǵyn úı salynyp jatyr. Jalpy turǵyn úı kólemi – 443 myń sharshy metr. Barlyǵy 6165 páter bar onda. Onyń ishinde bıyl ekonom-klass sanatyndaǵy 64 turǵyn úı paıdalanýǵa beriledi. Bul – 208 myń sharshy metr turǵyn úı. Sonyń nátıjesinde bıyl 3625 otbasy baspanamen qamtamasyz etiledi», – dep tolyqtyrdy sózin aýdan ákimi.

Qalqaman-2 shaǵyn aýdanyndaǵy turǵyn úı kesheniniń qurylysy men abattandyrý jumysynyń aıaqtalýy Almaty turǵyndaryn sapaly ári qoljetimdi baspanamen qamtamasyz etý baǵytyndaǵy mańyzdy qadam bolmaq.