Almaty oblysynda «Taza Qazaqstan» ekologıalyq baǵdarlamasy aıasyndaǵy sharalar jalǵasýda. Búgin óńirde ádettegideı «Taza beısenbi» aksıasy ótkizilip, 22 myńnan astam turǵyn tańmen talasa tazalyq jumysyna atsalysty. Igi sharada azamattar qorshaǵan ortaǵa qamqorlyq pen jaýapkershilik seziminiń úlgisin kórsetti. Olardyń qatarynda qoǵam belsendileri, oblys ákimdigi men memlekettik organ qyzmetkerleri, kásipkerler, jastar men eriktiler, turǵyndar bar. Nátıjesinde 510 tonna qoqys shyǵarylyp, 282 gektar aýmaq tazartyldy, – dep habarlaıdy Almaty oblysy ákiminiń baspasóz qyzmeti.
Aksıa barysynda qoǵamdyq oryndar men aýlalardaǵy qoqys jınalyp, abattandyrý jumysy júrgizildi. Qaıta óńdeletin qaldyq bólek suryptalyp, qalǵan qoqys arnaıy polıgonǵa jiberildi.
Senbilikke Almaty oblysynyń ákimi Marat Sultanǵazıev te qatysyp, qorshaǵan ortanyń tazalyǵy barshanyń ortaq qundylyǵy ekenin atap ótti.
«Ózimiz ómir súretin eldi mekenderdiń, qalalardyń, týrısik oryndardyń taza ári jaıly bolýy árqaısymyzdyń janashyrlyǵymyz ben jaýapkershiligimizge tikeleı baılanysty. Búginde «Taza Qazaqstan» baǵdarlamasy aıasynda oblysymyzda eldi mekenderdi abattandyrý, kógaldandyrý jáne ekologıalyq mádenıetti qalyptastyrý baǵytynda júıeli jumystar júrgizilýde.
Jaqynda aýmaqtardy kútip ustaýǵa qatysty qoldanystaǵy talaptar jańartyldy. Soǵan sáıkes aýmaqtyń sanıtarlyq tazalyǵyn saqtaý jáne turǵyn úıdiń irgeles 5 metr aýmaǵyn kútip-ustaý mindeti zańdy tulǵalarmen qatar jeke turǵyndarǵa da júkteledi. Osyǵan baılanysty aksıa burynǵydan da belsendi túrde júzege asyrylyp jatyr. Búgin biz dástúrli «Taza beısenbi» aksıasyn ótkizdik. Oblystyń túkpir-túkpinidegi turǵyndar bul sharaǵa beıjaı qaramaı, belsendilik tanytýda», – dedi Marat Eleýsizuly.
Ekologıalyq aksıaǵa úles qosqandardyń biri – Jastar resýrstyq ortalyǵynyń mamany Sanjar Sultan. «Ár azamattyń tazalyq sharalaryna atsalysýy mańyzdy. Sebebi tártip pen tazalyq eń áýeli ózimizden bastalady. Qazir jastar ár senbilikke úlken jaýapkershilikpen kirisedi. Ózderi de túrli ekologıalyq sharalar uıymdastyryp, jumyla jumys isteıdi. Máselen, «Qaýipsiz jaǵalaý», «Taza jaǵalaý» sıaqty aksıalar sonyń aıqyn dáleli. Bul «Zań men tártip» tujyrymdamasymen de astasyp jatyr. Qazirgi jastardyń kózqarasy ózgeshe, sondyqtan olardy qoǵamdyq tártip pen ekologıalyq mádenıetti saqtaýǵa jańa tásilder arqyly baýlý mańyzdy dep oılaımyn», – dedi ol.
Aıta keteıik, jyl basynan beri óńirde 25 oblystyq senbilik ótkizilip, oǵan 567 myńnan astam adam qatysty. Nátıjesinde 13 myń tonna qoqys shyǵarylyp, 7701 gektar aýmaq tazartyldy. 103 myńnan astym kóshet otyrǵyzylyp, 3500-ge jýyq tehnıka jumyldyryldy. Bul baǵyttaǵy sharalar aldaǵy ýaqytta da dástúrli túrde jalǵasady.
