Abaı Qunanbaıulynyń 180 jyldyq mereıtoıy on kún boıy toılandy. Abaı oblysynda arnaıy kıiz úıler qalashyǵy salynyp, memleket jáne qoǵam qaıratkerleri, ádebıet pen mádenıet maıtalmandary, aqsaqaldar Abaı týǵan aımaqqa attandy.
Toı tarqaǵan soń áleýmettik jelilerde Qazaqstan Respýblıkasy Parlamenti Senatynyń tóraǵasy Máýlen Áshimbaev pen Abaı oblysynyń ákimi Berik Ýálıdi «erikti jastar arnaıy sheńber quryp qorshap júrdi» degen jazbalar tarady. Jurtshylyqtyń pikiri ekige jarylǵan soń búgin QR Parlamenti Senatynyń baspasóz qyzmetiniń jetekshisi Danıar Ramazanov mán-jaıdy tarqatyp, arnaıy jazba júktedi óz paraqshasyna.
Oqyrmanǵa túsinikti bolýy úshin tómende atalǵan resmı ári naqty jaýaptyń tolyq mátini men siltemesin qosa júktep otyrmyz:
«Sońǵy kúnderde áleýmettik jelilerde Abaı toıyna barǵan Senat Tóraǵasy, Abaı oblysynyń ákimi, mınıstrler jáne saltanatty is-sharaǵa kelgen basqa da delegattardyń «qaýipsizdik sheńberimen» qorshalyp júrgeni týraly aqparat taraǵany belgili.
Osy máselege baılanysty Abaı oblysynyń ákimdigi, ákim Berik Ýálı, sondaı-aq, keshe mınıstr Saıasat Nurbek túsinikteme berdi. Rasymen, mundaı árekettiń múldem orynsyz ekenine eshqandaı kúmán joq. Biz atalǵan jaıtty kórgen boıda eriktilerden ony doǵaryp, basqa, mańyzdy istermen aınalysýyn suradyq. Osylaısha, bul jaǵdaı óte qysqa ýaqytqa ǵana jalǵasty.
Al, qalǵan ýaqytta biz kıiz úıler qalashyǵynda erkin júrip-turdyq. Merekege kelgen kez kelgen adam Senat Tóraǵasymen kezdesip, amandasyp, pikirleskenin osy vıdeodan-aq anyq kórýge bolady. Uzaq túsindirip jatqannan góri, bir ret kórsetip, máseleni osy jerden japqan durys dep oılaımyn.
Ókinishke qaraı, keıbir jeli qoldanýshylary on kún boıy atalyp ótken dúbirli toıdy jalǵyz osy keleńsizdikpen baılanystyryp, «jerden jeti qoıan tapqandaı» jarysa jazyp jatyr. Al, biz oıshyl ósıet etkendeı, qalpymyz ben sanamyzdy taza ustasaq, jarqyn sátterge kóbirek mán bersek, osy bir ulaǵatty isten ónege alsaq deımiz.
P.S. Jalpy, baspasóz hatshysy retinde, basqa-basqa, dál Senat Tóraǵasynyń halyqpen suhbat qurýǵa, qoıylǵan suraqtarǵa jaýap berýge, aıtylǵan pikirdi tyńdaýǵa árdaıym ashyq ekenin atap ótkim keledi. Bul rette ol eshqashan eshkimnen jaltaryp kórgen emes. Ony Máýlen Saǵathanulymen apta saıyn kezdesip, saýaldaryna jaýap alyp jýrnalıser qaýymy jaqsy biledi».
JAZBAǴA TİKELEI SİLTEME
