Belgili aqyn, QR Memlekettik syılyǵynyń ıegeri, Qazaqstan halyq jazýshysy Temirhan Medetbek 81 jasqa qaraǵan shaǵynda dúnıeden ótti. Bul týraly aqyn Qasymhan Begman áleýmettik jelidegi jeke paraqshasynda habarlady.

"Qazaq poezıasyna qubylys bolyp kelgen, ulttyń asqaq rýhty uly aqyny Temirhan Medetbek dúnıeden ótti.

Qarshadaıymnan óleńderin oqyp, qasyna ergen asyl aǵam, Qazaqstannyń halyq jazýshysy, Qazaqstan Memlekettik syılyǵynyń laýreaty, kórnekti aqyn Temirhan Medetbektiń dúnıeden ozǵanyn qazir ǵana Sholpan jeńgem maǵan eń birinshi habarlady.

Sońǵy aptada Temirhan aǵamyzdyń aýyr halde aýrýhanaǵa túsýine baılanysty otbasymen, dárigerlermen Jazýshylar odaǵynyń basshylary únemi habarlasyp turdy.

Qazaqstan Jazýshylar odaǵynyń Tóraǵasy Mereke Qulkenov ekeýimiz 2 kún buryn barǵanda jansaqtaý bólimine kirgizbegen soń, men «Aǵa, biz kelip turmyz, janyńyzdamyz» dep hat jazyp, qaldyryp ketip edim. 

Búgin Tóraǵa Mereke Qulkenov, onyń keńesshisi Ámirjan Qosanov jáne belgili kásipker Qanat Sánik tórteýimiz Almatydaǵy Sovmın aýrýhanasynyń aǵamyz jatqan jansaqtaý bólimine kezekpen kirip, únsiz baquldasyp, qoshtasyp shyqqan edik. 

Iá, ótkende ǵana aǵamyzdyń 80 jasyn dúrkiretip Almatyda toılaǵan edik. 81 qaraǵan shaǵynda ómirden ótti. Qazir ǵana Germanıadan Serik Táýkebaev, Almatydan Qanat Áshirbekuly Syǵaı habarlasty.

 Alamanda aldyna jan salmaı shapqan daýylpaz aqynnyń dúnıeden ótýine oraı búkil qazaq halqyna, onyń oqyrmandaryna qatty qaıǵyryp, kóńil aıtamyn.

Aqyn Temirhan Medetbektiń janazasy qashan shyǵatyny, qonaqasy, asy qaıda beriletini jaıly qosymsha habarlaıtyn bolamyz", – delingen habarlamada.