Ұлттық қауіпсіздік комитеті 12-30 тамыз аралығында Ақтөбе және Батыс Қазақстан облыстары аумағында үш радикалды топтың іс-әрекеттеріне тосқауыл қойды, - деп хабарлайды Qamshy.kz комитеттің баспасөз қызметіне сілтеме жасап.

Нәтижесінде радикалдардың құқық қорғау қызметкерлеріне шабуылдар жасау, сондай-ақ халық көп шоғырланатын орындарда терроризм актілерінің жасау жоспарларын іске асыру ниеттері бұзылған.

«Топ мүшелерінің тұрғылықты мекенжайларын тінту барысында бірнеше атыс қаруы және оған қажетті оқ-дәрілер, тротил, қолдан жасалған жарылғыш зат, суық қару, экстремистік мазмұндағы баспа және аудио материалдар, халықаралық террористік ұйымдардың төлбелгілері алынды.

Бұған қоса, топ мүшелерінің бірінен өз іс-әрекеттерін қаржыландыру мақсатында теңгелік жалған ақшалар, арнайы қағаз, компьютерлік және көбейту техникасы табылды», - делінген баспасөз хабарламасында.

ҰҚК «Көрсетілген топ мүшелеріне қатысты ҚР Қылмыстық кодексінің 174 («Әлеуметтiк, ұлттық, рулық, нәсiлдiк,тектік-топтық немесе дiни алауыздықты қоздыру»), 256 («Терроризмдi насихаттау немесе терроризм актiсiнжасауға жария түрде шақыру»), 257 («Террористік топ құру және оның қызметіне қатысу»), 231 («Жалған ақша немесе бағалы қағаздар жасау, сақтау, алып өту немесе өткізу»), 287 («Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру»), 288 («Қаруды заңсыз жасау») баптары бойынша сотқа дейінгі тергеу шаралары» жүргізіліп жатқанын хабарлады.

Сот санкциясына сәйкес Батыс Қазақстан облысының 10 тұрғыны және Ақтөбе облысының 11 тұрғыны қамауға алынған. Қазір тергеу амалдары жалғасуда.  

Бұған дейін ҰҚК лаңкестік әрекет жасамақ болды деген күдікпен Алматы облысы аумағында да радикалдық топтың төрт мүшесін ұстаған болатын.